اسلام آباد۔ 23 دسمبر (اے پی پی) وزیراعظم عمران خان پارینے کہ راج انا درستی راستی ءِ نزور تپہ تون اونا سلوک آن کننگک، اسلام آباد پولیس پوسکن آ پاکستان آنبار پوسکن آ پولیس نا وڑاٹ نظر برے، لس شاری ءِ شرف تننگے، پولیس ءِ ہیلتھ کارڈ انا آسراتی ایتنہ، پوسکن آ پاکستان ہاؤسنگ اٹ اوفتے قسط آتیا اُرا تننگک، تنخواہ تے ودفنگ آ سجفنگک، فوج ملکی سیم و پولیس الس نا جان و مال انا محافظ ءِ، حرام پیسہ جوڑ کروک آک اینو عبرت نا نشان جوڑ ءُ۔ بے تحاشہ پیسہ مننگ آن پد ہم وخت اس ہسپتال آتیاہِننگ ءُ و وخت اس ملک آن پیشن، چناک ہم پیشن نرانو و باوہ نا دُزی ءِ ڈکنگ کن دروغ تڑنگ ءُ۔ داخیال آتا درشانی ءِ او چارشنبے نادے آ داڑے پولیس لائنز اٹی پاسنگ آؤٹ پریڈ نا دود آن تران کرسا کرے۔ وزیراعظم عمران خان پارے کہ پاس آؤٹ مروک آ پولیس کارندہ غاتے سرسہبی آ مبارکبادی ایتیوہ۔ اوپارے کہ فوج ملکی سیم و پولیس الس نا جان و مال انا رمحافظ ءِ۔ السی شونداری و شونہالی کن جان و مال انا رکھ المی ءِ۔ کنا بننگ نا مسخت دا کلہو ءِ تروئی ءِ کہ دا ننا پولیس ءِ، ننے اودے شرف تروئی ءِ۔ اوپارے کہ راج اٹ بھلو ہند اس مریک۔ پولیس ءِ راج اٹ روا ہند رسینگتنے، اونا تاریخی سوب ءُ۔ انگریز آک پولیس نا کمک اٹ الس آزور شاغار۔ ہنداخاطرآن الس اٹ پولیس نا خلیس ئس۔ حالانکہ اوفتا تینا ملک اٹ پولیس داوڑ الوکہ۔ ہموڑے پولیس شاری تے تینا سرپند کریکہ و شاریک ہم پولیس ءِ تینا محافظ تکارہ ولے داڑے پولیس نا رویہ جتا ئس۔ کنا است خواہی ءِ کہ پاکستان نا پولیس ہم ہندن مرے کہ الس اوڑآ پت کے و اودے تینا سمجھے۔ وزیراعظم پارے کہ تحریک انصاف خیبرپختونخوا ٹی پولیس ءِ بدل کرین۔ پولیس دہشت گردی نا گواچی ئس و اونا 500 ورنا شہید مسوسر ومورال ڈاؤن ئس ولے دا پولیس ہندن بدل مس کہ مردان نا شاریک پولیس نا مخ تفی ٹی جلوس کشار۔ وزیراعظم ورناتے پارت کرے کہ حلال رزق انا کسر ءِ اختیار کیر۔ اوپارے کہ نیکی نا کسر آ ہِننگ آسان اف ولے اوڑآ ہِننگ سرسہبی ءِ۔ وزیراعظم پارے کہ ہراتم ای کرکٹ گوازی کریٹہ تو ساؤتھ افریقہ ٹی کرکٹ کرسا بھاز پیسہ کٹنگ کریٹہ و ہراتم کیپٹن مسٹ تو ہندوستان نا بکیز بھاز پیسہ غاتا آفر کرے ولے اسہ کسر شیطانیت و ایلو کسر عظمت نا کسر ءِ ہرااللہ نا نبی صلی اللہ علیہ و آلہ وسلم نا کسر ءِ۔ ننے دا کسر آ ہنوئی ءِ۔ اوپارے کہ کنے احساس ارے کہ پولیس و تنخواہ دار تپہ نا تنخواہ کم ءِ۔ کبینی ودسا ہنا ولے تنخواک ہمو حساب اٹ ودیتوس ولے ای ورناتے دا پنت و شون کیوہ کہ او پیسہ کن غلط انگا کسر ءِ اختیار کپس۔ اوپارے کہ ہراسیاستدانک غلط کسر ءِ اختیار کرسا پیسہ جوڑ کریر حقیقت اٹ اوفتا دوٹی ہچ اس بتو۔ دُزی نا پیسہ غاتا ہچ ءُ فائدہ اس اف دا ہچ کس نا کاریم بفسہ۔ ہراسیاستدانک حرام نا کمائی کریر، اینو اوفک عبرت نا نشان جوڑ ءُ۔ اوفتے تون بے تحاشہ پیسہ ارے ولے اوکان پد ہم وخت اس ہم ہسپتال تیا ہِننگ ءُ و وخت اس ملک آن پیشن۔ اوفتا چناک ہم پیشن نرانوو اوفتے باوہ نا دُزی ءِ ڈکنگ کن دروغ تڑوئی تمنگ ءِ، داوڑنا پیسہ غاک اللہ نا عذاب ءُ۔ وزیراعظم پارے کہ ہر راج اٹ زرکاری امن و ایمنی آن بریک۔ سمندر پار پاکستانیک ہرا پاکستان نا میرات ءُ۔ داڑے پلاٹ ہلیرہ یا اُرا جوڑ کیرہ تو اوفتیا کوزہ کننگک۔ داوڑ اٹ زرکاری مننگ کپک۔ اوفتے دا پت تروئی مریک کہ اوفتا سرمایہ و پیسہ غاک رکھوک ءُ۔ دا چرجوئی ٹی پولیس نااہم ءُ کڑد اسے۔ اوپارے کہ پاکستان نا شونداری ٹی پولیس نا بھاز اہم ءُ کڑد اسے۔ اسلام آباد پولیس نا تنخواتے پنجاب پولیس نا بریبر کننگ آ سجفنہ ولے دا مشکل ءُ وخت اسے ہراتم اُراوامدار مرے و وامک ودر تو داوڑاٹ خڑچ آتے کم کروئی تمک۔ وزیراعظم ہاؤس و بنجائی حکومت نا خڑچ آتیٹی نمان کمتی کننگانے۔ نن وام تیا ملک ءِ چلیفنگ کپنہ۔ الحمداللہ حکومتی گام گیج آتیان کرنٹ اکاؤنٹ سرپلس مسنے و نن سہی کنڈآ ہِننگ اُن۔ انشاء اللہ حالیت آک بھاز جوان مریرہ۔ وزیراعظم پارے کہ اسلام آباد پولیس نا کارندہ غاتے ہم ہیلتھ کارڈ تننگک ہرانا کمک اٹ اوو اوفتا خاہوت نا بندغ آک ہر ہسپتال اٹ 10 لکھ روپئی نا درمان کرفنگ کیرہ۔ پوسکن آ پاکستان ہاؤسنگ اسکیم بھاز بھلو پروگرام اسے۔ داٹی اسلام آباد پولیس ءِ قسط آتیا اُراایتنہ۔ اوپارے کہ آئی جی اسلام آباد نا خواست آتا بابت او وزیر خزانہ تون ہیت کیک و خواست آتیا سجفنگک۔ وزیراعظم پارے کہ پورو کوشست مریک کہ اسلام آباد پولیس نا غٹ ویل آتے ایسر کین۔ وخت بسنے کہ پولیس ہندن مرے کہ راج اٹ اونا شرف مرے و الس اودے تینا سمجھے۔ اوپارے کہ اسلام آباد پولیس اٹ پرخ نظر برے۔ پوسکن آ پاکستان آنبار پولیس ہم پوسکن بایدے مرے۔ اوپارے کہ ای خواوہ کہ پولیس ہربندغ تون ہمووڑ سلوک کے ہراوڑ وی آئی پی تتون کننگک انتئے کہ راج انا درستی راستی نزور تپہ غاتون اوفتا سلوک آن کننگک۔ داکان مست وزیراعظم نمان کارکڑد نشان تروک آ ورناتے تیٹی اعزاز بشخا و پریڈ نا معائنہ ءِ کرے۔ وزیر داخلہ شیخ رشید احمد ہم اوڑتون اوار ئس۔
