نیب کانود اٹی بدلی کن اپوزیشن تون سودا بازی کپک، وزیر خارجہ شاہ محمود قریشی

ملتان۔ 23 دسمبر (اے پی پی) وزیر خارجہ مخدوم شاہ محمود قریشی پارینے کہ نیب کانود اٹی بدلی نا گنجائشت ارے ولے اونا کانود اٹی بدلی کن اپوزیشن سودابازی نا ہرا کوشست آتے کننگ ءِ داوڑ مننگ کپک۔ حضرت شاہ رکن سہروردی نا مسہ دے ئی سالانہ عرس انا ایسری دود آن پد چارشنبے نادے آ میڈیا تون گپ وتران کرسا وزیر خارجہ مخدوم شاہ محمود قریشی پارے کہ ایف اے ٹی ایف ملکی معاملہ اسے اودے سودا بازی یا جند انا فائدہ غاتا رداٹ ہُننگپ۔ ایف اے ٹی ایف نا معاملہ غا اپوزیشن نیب کانود اٹ تینا جند انا فائدہ غاتا ایجنڈا نا رداٹ رعایت خواہک دا تدوک آ دہ سال آن حکومت اٹی ئسر اوفتے نیب کانود اٹ اٹ بدل کروئی ئس۔ اوفک ننا مون آ 34 ٹکی نیب کانود اٹ بدلی نا مسودہ ءِ تخار اودے خواننگ آن پد اوفتیان این آر او نا گند بننگ ءِ ہنداخاطرآن نن سودابازی کپنہ۔ اوپارے کہ وزیراعظم عمران خان پی ڈی ایم نا لاہور جلسہ ٹی اڑاند آتا برخلاف ئس و نن اڑاند ہم شاغتون ہنداوڑ ملتان جلسہ ٹی ہم اگہ اوفتے اسٹیڈیم اٹ جلسہ کننگ کن ہلنگاکہ تو ولدا نئے دا غازی مسرہ و نئے شہید مننگ کریرہ، داسہ ہم اوفک استیفہ تننگ نا ڈرامہ ءِ بند کیراگہ تننگ خوارہ تو ولدا اسمبلی تا اسپیکرآتے استیفہ ایترولے پی ڈی ایم اٹی دا معاملہ و اوفتا بیانیہ نا معاملہ غا اتفاق اف۔ جمعیت علمائے اسلام نا بھلا راہشونک تینا گڑتی و خیال آتا درشانی ءِ کرینو ہنداوڑ (ن) لیگ اٹی ہم اِرا دھڑ ءُ، پاکستان پیپلزپارٹی نا میٹنگ آتیٹی تولوک آ بندغ آک بے اختیار ءُ اونا اصل فیصلہ غاتے آصف علی زرداری کیک، نن بیرہ ملکی فائدہ غاتیٹی غٹ اتون گپ وتران کن تیار اُن۔ اسہ سوج اسے نا ورندی ٹی شاہ محمود قریشی پارے کہ ننا ہندوستان تون نئے تو بیک ڈور رابطہ ءِ نئے اونا گنجائشت ءِ، ہندوستان ءِ سماءِ کہ اگہ او پاکستان نا برخلاف گام اس ہرفے تو ورندی اخس سخت مریک۔ ہندوستان تہہ نا بے چیٹی نا گواچی ءِ اونا اقلیت آک ہموڑےبے رکھ ءُ اونا کشمیر پالیسی بے سہب مسنے ہرادے ہموجاگہ نا الس و پامدار آک ہم مسترد کرینو، ہموڑے بے روزگاری ودنگ ءِ، زرکاری کم مننگ ءِ، داوخت آ بھارت تون مذاکرات نا ہچ ءُ ماحول اس اف۔ وزیر خارجہ پارے کہ ننا پی ڈی ایم نا تحریک ءِ تشدد یا زور بازو اٹ توننگ نا ہچ ءُ ارادہ اس اف تحریک آتے پولیس نا کمک اٹ توننگ مفک نن سیاسی کارندہ اُن و سیاسی وڑاٹ ہی اوفتا مقابلہ ءِ کینہ۔