وزیراعظم عمران خان نا دیانتداری، سچائی و خواری ءِ مچ آ قوم منک، وزیر داخلہ شیخ رشید احمد

اسلام آباد۔ 23 دسمبر (اے پی پی) وزیر داخلہ شیخ رشید احمد پارینے کہ وزیراعظم عمران خان نا دیانتداری، سچائی و خواری ءِ مچ آ قوم منک، او ویل آتون جوان وڑاٹ مون تننگ ءِ، سیاسی، زرگزرانی تنکی تیان قوم ءِ کشسا مون آ دیک، وزارت داخلہ 120 دے اٹ بدل مریک۔ الس ءِ آسراتی فراوان کینہ، پارک و باغ تے گچین کینہ، ناکہ غاتے چٹفین، پولیس ءِ پین گاڈی ایتنہ، داخیال آتا درشانی ءِ او چارشنبے نادے آ داڑے پولیس نا پاسنگ آؤٹ پریڈ نا دود آن تران کرسا کرے۔ وزیراعظم عمران خان ءِ مخاطب کرسا اوپارے کہ اللہ تعالیٰ نے شرف تسنے و نی پولیس ءِ شرف تسونس۔ نی اولیکو وزیراعظم اُس ہرا پولیس نا پاسنگ آؤٹ دود اٹ بشخ ہلکونس۔ داڑآن کراچی آن طورخم اسکان امن و ایمنی نا فرض ءِ سرتروک ہر ورناءِ اینو شرف ملانے و اوفتا کاٹم گمراٹ بڑز مسنے۔ اوپارے کہ اسلام آباد اٹی پنچ سد کیمرہ خراب ئسر، داسہ غٹ ہژدہ سد کیمرہ سہی کاریم کننگ ءُ، پولیس چوکی ہراڑے شاری تے تنک کننگاکہ اوفتے داسہ چٹفینن، بیرہ مسہ چوکی پین ءُ اوفتے ہم پین گاڈی ملنگ آ چٹفنگک۔ اوپارے کہ وزیراعظم ہراوڑاٹ کاریم کننگ ءِ اونا پن انا ڈنکا بیرہ پاکستان آخا، مچ آ دنیا ٹی لگک۔ اسلام آباد اٹی گچین ٹیم کاریم کننگ ءِ، پولیس نا پاسنگ کن دوسد کنال ڈغار رسینگانے۔ وزیراعظم آن خواست ءِ کہ چار سد کنال تننگ نا پرمان جاری کے، اسلام آباد اٹی پنچ سد مدرسہ ءُ ہراڑے قرآن و سنت نا تعلیم تننگک، نن غٹ مکاتب فکر انا عالم آتون اوار کانہ، 120 دے اٹی وزارت داخلہ بدل مریک، الس ءِ آسراتی ایتنہ، پولیس مشکل حالیت آتیٹی امن و ایمنی نا فرض ءِ سرتننگ ءِ، اینو یانزدہ سد ورنا پولیس اٹی اوار مننگ ءُ۔ وزیراعظم پولیس نا پین پنچ سد ورناتا بھرتی نا منظوری ءِ تس، 120 دے اٹی غٹ پارک آتے گچین کینہ، غٹ پارک آتیٹی اسہ وڑنا آسراتی فراوان کینہ۔ اووزیر اعظم آن اسلام آباد پولیس نا تنخواہ تے پنجاب پولیس نا بریبر کننگ نا خواست کرے۔