بلوچستان اسمبلی نا دیوان، کوئٹہ شار اٹی ٹریفک نا حالیت ، خراب انگا دیرتیان سوزی دسنگ و روڈ آتا حالیت آتا بابت جاست و پاستی کمیٹی اس جوڑ اسہ تواسے نا تہٹی رپورٹ ئِ تیار کرسا اسمبلی دیوان اٹی پیش کننگ ناحکم

کوئٹہ۔ 10 مارچ (اے پی پی) بلوچستان اسمبلی نا دیوان جمعہ نا دے پینل چیئرمین نا باسک یاسمین لہڑی نا کماشی ٹی بناءکرے ۔ دیوان اٹی پوائنٹ آف آرڈر نیاڑی باسک صوبائی اسمبلی شاہدہ رﺅف کوئٹہ ٹی ٹریفک ، روڈ آتا حالیت، نکاسی آب ، خراب انگا دیر تیان سوزی دسنگ نا سمت ایوان نا چکار ئِ مبذول کرفے۔ اسپیکر دااہم انگا ویل آ رولنگ ترسا نیاڑی باسک صوبائی اسمبلی شاہدہ رﺅف نا سروکی ٹی اسہ جاست و پاستی کمیٹی اس جوڑ کننگ نا حکم تس کمیٹی اسہ تو اسے نا تہٹی شارانا حالیت آتا جاچ ئِ ہلسا تینا رپورٹ ئِ ایوان اٹی پیش کیک۔ کمیٹی ٹی نیشنل پارٹی نا نیاڑی باسک صوبائی اسمبلی ڈاکٹر شمع اسحق، پشتونخوامیپ انا باسک صوبائی اسمبلی مجید خان اچکزئی، باسک صوبائی اسمبلی غلام دستگیر بادینیم، وزیراعلیٰ بلوچستان نا سلاہکار سردار رضامحمد بڑیچ، انجینئر زمرک خان اچکزئی و کوئٹہ آن گچین مروک شش اسمبلی نا باسک آک اوار مریرہ۔ کورم نا پیدواری آ ایجنڈا ٹی اوار چارقرارداد آتے بروک آ دیوان کن پد بٹنگا ہراڑآ اسپیکر اسمبلی دیوان ئِ 13مارچ انا بیگہ نا چار بجہ اسکان ملتوی کرے۔