خصوصی بندغ آتا راجی آسراتی و راجی رویہ غاتیٹی گچینی اتنگ اٹ میڈیا کڑد ادا کننگ کیک، صدر مملکت ڈاکٹر عارف علوی نا میڈیا نا پن آ چھٹی

اسلام آباد۔ 22 دسمبر (اے پی پی) صدر مملکت ڈاکٹر عارف علوی خصوصی بندغ آتا حق انا بابت مخلوق اٹ آگاہی ودی کننگ نا گرج آ زور شاغسا پارینے کہ میڈیا خصوصی بندغ آتا راجی آسراتی و اوفتا بابت راجی رویہ غاتیٹی بدلی اٹ اہم ءُ کڑد اس ادا کننگ کیک۔ سے شنبے نادے آ ایوان صدر نا پریس ونگ آن جاری بیان نا رداٹ صدر مملکت ڈاکٹر عارف علوی میڈیا ءِ لکھوک آ تینا چھٹی ٹی پارینے کہ خصوصی بندغ آتا حق انا بابت مخلوق اٹ آگاہی ودی کننگ نا گرج ءِ، پاکستان اٹ کم و ود 15 درسد بندغ جتا وڑنا معذوری تا گواچی ءُ۔ اوپارے کہ خصوصی بندغ آتے تعلیم نا کمتی، روزگار و السی ہند آتسکان رسینگ اٹ مشکل آتون مون تروئی تمک۔ خصوصی بندغ آتا راجی آسراتی اسہ بھلو چیلنج اسے ہراڑتون مون تننگ کن راج انا غٹ تپہ غاتے کاریم کننگ نا گرج ءِ۔ صدر ڈاکٹر عارف علوی پارے کہ حکومت خصوصی بندغ آتے مالی وڑاٹ وتواجہ کننگ و تعلیمی ادارہ و ملازمت نا جاگہ غاتسکان رسینگ تننگ کن گام گیج کننگ ءِ۔ راج ءِ خصوصی بندغ آتا حق و ویل آتا بارواٹ احساس ترفنگ نا گرج ءِ۔ اوپارے کہ خصوصی بندغ آتا راجی آسراتی و راجی رویہ غاتیٹی گچینی اتنگ اٹ میڈیا کڑد ادا کننگ کیک۔ میڈیا بریسٹ کینسر و کورونا دین انا بارواٹ آگاہی ودی کننگ اٹ بے مٹ کڑد ادا کرے۔ اواومیت ظاہر کرینے کہ میڈیا خصوصی بندغ آتا حق انا مون آ دننگ اٹ اسہ وار ولدا کمکاری نا درشانی ءِ کیک۔