اسلام آباد۔ 10مارچ (اے پی پی) حکومت ملک اٹی اولیکو وار اندراج تون 40 ہزار روپئی مالیت نا پریمیئم بانڈ ئِ جاری کرے۔ 40 ہزار روپئی نا مالیت نا بانڈ آ بھلا انعام 8 کروڑ روپئی مریک وخت اس کہ بانڈآ سہ ماہی انعام آتون ششماہی کٹیا ہم تننگک۔ بنجائی وزیر خزانہ سینیٹر اسحاق ڈار جمعہ نا دے داڑے اسہ دود اسے ٹی پریمیئم بانڈئِ باقاعدہ جاری کرے۔ داوخت آ تران کرسا اوپارے کہ غیر رجسٹرڈ بانڈ آتا کاریم اٹ اتنگ مون انگا دھند ئِ پیہون کننگ کن کننگاکہ ہرادے توننگ کن حکومت 40 ہزار نا بانڈ ئِ رجسٹرڈ کننگ نا فیصلہ کرینے۔ اوپارے کہ رجسٹرڈ بانڈ ئِ غلط کاریم اٹ اتنگ مفک، مچ آ دنیا ٹی رجسٹرڈ بانڈ جاری کننگک۔ اسحاق ڈار پارے کہ دابانڈ، خلقت، نجی و سرکاری کمپنی تے کن دستیاب مریک ولے بینک اوفتے ہلنگ کیرہ۔ اوپارے کہ انعامی زر کٹوک آنا انعام براہ راست اونا اکاﺅنٹ اٹی گدریفنگک۔ اوپارے کہ گڑاس وخت آن پد اسہ لکھ روپئی نا رجسٹرڈ بانڈ ہم جاری کننگک۔ اسحق ڈار پارے کہ حکومت معیشت اٹی جامع اصلاحات نا کمک اٹ الس تون کروک آ وعدہ غاتے پورو کننگ ئِ۔ اوپارے کہ ملک انا اقتصادی شونداری نا جہانی کہول آ اعتراف کننگ انگ ئِ و غٹ اقتصادی ٹک آتے ٹی مثبت رجحان برجائِ۔ جہانی اقتصادی چاہندار آتا رداٹ پاکستان 2030 ءاسکان دنیا نا سرفہرست 20 معیشت آتیٹی اوار مریک۔ اوپارے کہ پاکستان خراج دزی ئِ ہلنگ نا غرض آن بینک معلومداری نا تبادلہ کن زوت سوئٹزر لینڈ اتون ہڑتوم آ کنڈآتا معاہدہ غا دستخط کیک۔ ہنداوڑ پاکستان 2018ءآن او ای سی ڈی نا باسک ہم جوڑ مریک۔ دا گام گیج آتیان خراج دزی نا مونئِ توننگ اٹی کمک رسینگک۔ اوپارے کہ ملک انا معیشت اتون سیاست کننگپ۔ ننا اولیت ملک انا بایدے گچینی مرے۔
