بنجائی حکومت نا ڈرون ریگولیٹری اتھارٹی اس جوڑ کننگ نا فیصلہ، وزیراعظم عمران خان کمیٹی اس جوڑ کننگ نا پارت کرے

اسلام آباد۔ 22 دسمبر (اے پی پی) بنجائی حکومت ڈرون نا کاریم اٹ اتنگ کن ڈرون ریگولیٹری اتھارٹی اس جوڑ کننگ نا فیصلہ کرینے۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم عمران خان ءِ ڈرون پالیسی اس جوڑ کننگ نا بابت بنجائی وزیر سائنس و ٹیکنالوجی چوہدری فواد حسین بڑزکو کہول انا حوال تس۔ وزیراعظم عمران خان ءِ ڈرون ٹیکنالوجی نا چندی بشخ آتیٹی پرامن و پٹ وپولی کاریم اٹ اتنگ آ سرجم حوال تننگا۔ وزیراعظم پارے کہ ڈرون ٹیکنالوجی نا کشت وکشار، شاری ڈٹ بندی، سیکورٹی و امن کن بھاز فائدہ غاک ءُ۔ اودارداٹ کانود سازی و ریگولیٹری اتھارٹی اس جوڑ کننگ کن کمیٹی اس ٹہیفنگ نا پارت کرے۔ کمیٹی اسہ تُو انا تہہ ٹی ڈرون ریگولیٹری اتھارٹی نا کانود نا مسودہ ءِ وزیراعظم ءِ پیش کیک۔