اسلام آباد۔ 22 دسمبر(اے پی پی) ڈپٹی اسپیکر قومی اسمبلی قاسم خان سوری پارینے کہ بین المذاہب ہم آہنگی نا کمک اٹ ملک ءِ شونداری و شونہالی نا کنڈآ دننگ مریک۔ سے شنبے نادے آ پارلیمنٹ ہاؤس اٹ کرسمس نا رداٹ اڈ ہلوک آ دود آن تران کرسا اوپارے کہ دنیا نا غٹ مذہب آک امن، مہرومریبت، سگ و انسانیت نا شرف ءِ کننگ نا سبخ ایترہ۔ دنیا ٹی سوگو امن کن بین المذاہب مکالمہ المی ءِ۔ گچین آخبت کن ننے اختلاف آتے گیرام کرسا اسہ ایلو تون تینا خوشی و ڈکھ آتے بشخوئی مریک۔ پاکستان نا آئین ملک انا غٹ شاری تے بے پرخ رنگ و نسل و مذہب بریبر حق ایتک۔ عمران خان نا کماشی ٹی ساڑی حکومت بے پرخ رنگ و نسسل و مذہب غٹ شاری تا راجی آسراتی کن کوشست کننگ ءِ۔ قاسم خان سوری پارے کہ داوخت آ دنیا ءِ کوویڈ۔ 19 نا دین انا مون تروک ءِ ہرانا مقابلہ ءِ اسہ ایلو ٹی سیوت و سخا و رکھی گام گیج آتیا سختی اٹ عملدرآمد اٹ ممکن ءِ۔ حضرت عیسیٰ اللہ نا برگزیدہ نبی و پیغمبر ءِ و مسلمان تیکن بھاز قابل شرف ءِ۔ حضرت عیسیٰ مہرومریبت، سخا، سگ، عدم تشدد و انسانیت ناخذمت نا رغاما۔ پاکستان اٹ رہینگوک آ مسیحی برادری نا ملک انا شونداری و شونہالی کن خذمت ستاکڑزک۔مچ آ دنیا ٹی رہینگوک آ مسیحی برادری خاص وڑاٹ پارلیمنٹ ہاؤس اٹ مسیحی برادری آن تعلق تخوک آ ملازم آتے کرسمس نا مبارکبادی ایتیوہ۔
