اسلام آباد۔ 22 دسمبر (اے پی پی) سروک پاک فضائیہ ایئر چیف مارشل مجاہد انور خان پارینے کہ ساڑی حالیت آتا رداٹ چینی ملٹری ایوی ایشن ٹیکنالوجی پوسکن آ دور انا عسکری گرج آتا اسہ اہم ءُ جزو اسے و ساڑی آ دور انا غٹ چیلنج آتون مقابلہ کننگ نا پورو لائخی تخک۔ داخیال آتا درشانی ءِ او پاک فضائیہ نا اسہ آپریشنل بیس آ برجا پاک چین اسیجائی مشق شاہینIXاٹی اسہ پوسکن ءُ چینی ساختہ جنگی جہاز اس بال تننگ آن پد کرے۔ چینی پائلٹ آتا کسبی چاہنداری نا ستاءِ کرسا ایئر چیف پارے کہ چینی پائلٹ آتا عسکری ہوابازی نا بھلالائخیک پی ایل اے اے ایف نا پوسکن آ تربیت نا ڈیک ءُ ، مشق انا سرسہب اڈتننگ آ ایئر چیف ہوابازی نا وسیع میدان اٹ جدیدیت ءِ استوار کننگ کن ہڑتوم آ فضائی فوج آتا تین پہ تینی کمکاری آ است جمی نا درشانی ءِ کرے۔ ایئر چیف پارے کہ پوسکن آ دور اٹی عسکری ہوابازی نا میدان اٹ شونداری کن نئے بیرہ ٹیکنالوجی ٹی چاہنداری دوئی کننگ المی ءِ بلکن دا چاہنداری نا اطلاق جنگی حکمت عملی و تدبیر ہڑتوم آتیا کننگ ہم ہنداخہ اہم ءِ۔ تینا ہیت ءِ برجاتخسا ایئر چیف پارے کہ شاہین سیریز مشق ہڑتوم آ فضائی فوج آتیکن اسہ ایلو نا جنگی مہارت آن فائدہ ہرفنگ و تین پہ تینی کمکاری ءِ مون آ دننگ تون اوار اوار ہڑتوم آ فوج آتا عسکری لائخی و آپریشنل تیاری تے سوگوی تننگ اٹ ہم کمکار مریک۔ پاک چین اسیجائی فضائی مشق شاہین IXہراکہ 9 دسمبر آ بناکریسس تینا آخیریکو ریسہ غاتیٹی پترینگانے۔
