واشنگٹن، لندن، نئی دہلی، ریوڈی جنیرو۔ 22 دسمبر (اے پی پی) مچ آ دنیا ٹی کورونا نا دین آن مرک آتا کچ 17لکھ 10 ہزار اسکان سرمس، چندی ملک آتیٹی ہلوک آ دین آن زہمی بندغ آتا کچ 7 کروڑ 77 لکھ آن گدرینگانے۔ سے شنبے نادے آ امریکی میڈیا نا رداٹ دنیا نا چندی ملک آتیٹی کورونا دین انا پک زہمی تا کچ 77740380ءِ، دین آن زہمی ملک آتیٹی داتم اسکان 1710107بندغ زوال کرینو۔ مچ آ دنیا ٹی کورونا نا فعال زہمی تا کچ 21411220ءِ، کورونا نا دین آن امریکہ غٹ آن زیات زہمی مسنے۔ برازیل کورونا دین آن مروک آ زوال کروک آتا لحاظ اٹ ارٹ میکو و ناجوڑ آتا بابت مسٹ میکو نمبر آٹے وخت اس کہ بھارت کورونا دین انا ناجوڑ آتا کچ انا اعتبار اٹ ارٹ میکو و زوال کروک آتا حساب وکتاب اٹ مسٹ میکو زہمی ملک ءِ۔ کورونا دین آن میکسیکو ٹی اسہ لکھ 58 ہزار، فرانس اٹی 60 ہزار 9 سد، سپین اٹی 49 ہزار، اٹلی ٹی 69 ہزار، روس اٹی51 ہزار، ایران اٹی 53 ہزار، ترکی ٹی 18 ہزار و چلی ٹی 16 ہزار آن زیات بندغ زوال کرینو۔ امریکہ ٹی کورونانا دین آن زہمی بندغ آتا کچ اسہ کروڑ 84 لکھ 73 ہزار مس وخت اس کہ مچ آ ملک اٹی دین آن مرک آتا کچ مسہ لکھ 26 ہزار آن زیات ءِ۔ امریکہ ٹی کورونا دین انا ناجوڑ آتا جم کچ 18473716ءِ وخت اس کہ فعال زہمی تا کچ 7344448ءِ۔ امریکہ ٹی ہلوک آ کورونا نا دین آن داتم اسکان 326772بندغ زوال کرینو۔ بھارت اٹی ہلوک آ کورونا دین انا زہمی تا کچ اسہ کروڑ 75 ہزار و مک آک اسہ لکھ 46 ہزار اسکان سرمسنو۔ تدوک آ 24 گھنٹہ ٹی ملک اٹی کورونا دین انا 19174پوسکن ءُ کیس رپورٹ مسنے۔ کمامدارآتا پاننگ ءِ کہ داٹی مچ آ ملک اٹی کورونا دین آن پین 301 بندغ زوال کرینو۔ بھارت نا چندی ریاست آتیٹی کورونا آن زہمی بندغ آتا کچ 10075422ءِ وخت اس کہ بھارتی وزارت جان جوڑی نا حساب وکتاب نا رداٹ مچ آ ملک اٹی کورونا دین انا فعال کیس آتا کچ 293662ءِ۔ وزارت جان جوڑی نا کمامدارآتارداٹ بھارت اٹی کورونا دین آن داتم اسکان جم وڑاٹ 146145بندغ زوال کرینو۔ ہمیڑے برازیل اٹی کورونا دین آن مرک آتا کچ اسہ لکھ 87 ہزار آن گدرینگانے وخت اس کہ ہلوک آ دین آن زہمی بندغ آتا کچ 72 لکھ 64 ہزار آن ودانے۔ برازیل اٹی کورونا دین انا پوسکن آ کیس آتیان پد پک ناجوڑ آتا کچ 7264221مس۔ برازیل اٹی داوخت آ کورونا دین انا 789919فعال ناجوڑ ءُ۔ برازیل نا وزارت جان جوڑی نا حساب وکتاب نا رداٹ ملک اٹی کورونا دین آن زوال کروک آتا پک کچ 187322ءِ۔ برطانیہ ٹی کورونا دین آن زہمی بندغ آتا کچ 20 لکھ 73 ہزار آن زیات ءِ، ملک اٹی داتم اسکان ہلوک آ دین آن 67 ہزار 6 سد آن زیات بندغ زوال کرینو۔ برطانوی وزارت جان جوڑی نا کمامدارآک پاریر کہ تدوک آ 24 گھنٹہ ٹی برطانیہ ٹی کورونا دین آن پین 215 بندغ زوال کرینو، داٹی ملک اٹی کورونا دین انا 33364 پوسکن ءُ کیس رپورٹ مسنے۔ ملک اٹی کورونا زہمی تا جم کچ 2073511 اسکان سرمسنے۔ برطانیہ ٹی دا جان ءِ ہلوک آ دین آن داتم اسکان 67616بندغ زوال کرینو۔
