ملتان۔ 21 دسمبر (اے پی پی) بھارت تون اوار اوار مچ آ دنیا ءِ پارینن کہ اگہ بھارت سرجیکل سٹرائیک نا کوشست کرے تو پاکستان نا کنڈآن اونا گمان آن ہم زیات سخت پبی و دمدستی ورندی تننگک۔ حضرت شاہ رکن عالم سہروردی نا 707 می عرس انا وخت آ دوشنبے نادے آ میڈیا تون گپ وتران کرسا اوپارے کہ ننے بھارت نا سرجیکل اسٹرائیک و پاکستان ءِ نزور کننگ نا بھارتی کوشست آتا بارواٹ اونا سوچ آن ہم زیات معلومداری ارے پاکستان امن پسند ءُ ملک اسے نن بے جا خون خرابہ و جنگ کننگ خواپنہ ولے اگہ داوڑ مس تو اونا زموار بھارت مریک۔ داڑآن ڈیہہ نا امن ہم خراب مریک۔ اقوام متحدہ نا مبصر آتا گاڈی آ لائن آف کنٹرول آ انڈیا سم کاری کرے اقوام متحدہ دانا دمدستی نوٹس ءِ ہلے۔ دابارواٹ وزیراعظم پاکستان ہم پیدوار کلہو تسنے بھارت ءِ پیدوار کلہو ءِ کہ او تینا حرکت آتیان باز برے۔ اوپارے کہ کنا ساڑی آ یو اے ای نا دورہ نا وخت آ دبئی نا حکمران و یو اے ای نا وزیر خارجہ تون مرغن ءُ نشست اس مس ہراٹی ویزہ و ایلو باندات آ سرجم گپ وتران کننگا۔ او سمجھرہ کہ پاکستان نا ہچ ءُ پین نعم البدل اس اف۔ ای دا ابہام ءِ مُر کننگ خواوہ کہ ویزہ بندش عارضی ءِ زوت دا بندش چٹک۔ یو اے ای والاک مریر یا سعودی عرب او ہندوستان ءِ ننا متبادل سمجھپسہ، ہندوستان دا کوشست اٹ لگوک ءِ ولے اوغلط فہمی آن پیش تمے اونا کوشست سرسہب مفک۔ یو اے ای کمامدار آتے دورہ پاکستان نا سلہ خلکونٹ زوت او پاکستان نا دورہ ءِ کیرہ۔ ای تینا دورہ نا وخت آ اسرائیل تون اوفتا تعلقداری نا بارواٹ اوفتا نقطہ نظر ءِ بنگٹ و سمجھاٹ و اسرائیل نا بارواٹ پاکستانی موقف نا بارواٹی ہم پارینن کہ ہراتم اسکان فلسطین نا ویل انا سوگو ءُ ایسر اس پیش تمپک نن اسرائیل تون تعلقداری تخنگ کپنہ۔اوہم ننا موقف ءِ پہہ مسنو ای دا پیدوار کیو کہ اسرائیل ءِ تسلیم کننگ کن پاکستان آ ہچ ءُ زور اس اف ننا تینا پالیسی ءِ ننا تینا جند انا فائدہ غاک ءُ نن تینا پالیسی و فائدہ غاتے مون آ تخسا فیصلہ کینہ۔ وزیر خارجہ پارے کہ ہندوستان مدام پاکستان ءِ نسخان تننگ نا کوشست کرے، 14 نومبرآ نن دنیا نا مون آ بھارت نا پاکستان نا برخلاف کروک آ گام گیج آتا شاہدی تتون ڈوزیئر ءِ تخان وخت اس کہ یورپی یونین ہم بھارت نا کنڈآن پاکستان نا برخلاف برجا چندی کوشست ہراٹی ڈس انفارمیشن کن جعلی این جی اوز و جعلی سوشل میڈیا پڑک آتا کمک اٹ پاکستان ءِ بدنام کننگ نا کوشست آتا سرجمی اٹ ذکر ءِ دنیا نا مون آ ایسونن، داسہ بھارت نا دروشم بے نقاب مسنے۔ اسہ سوج اسے نا ورندی ٹی شاہ محمود قریشی پارے کہ کورونا دین انا دنیا ٹی حالیت آک گھمبیر مرسا کننگ ءُ۔ برطانیہ، جرمنی و ایلو ملک آک تینا ایس او پی تے بدل کننگ نا بناءِ کرینو کورونا دین مست آن زیات خطرناک مرسا ہِننگءِ پاکستان ہم دنیا غان الگ تھلگ ءِ، مننگ کیک بھارت و کورونا دین انا حالیت آتا رداٹ پی ڈی ایم جند انا فائدہ غاتیان پیش تمسا داسہ قومی فائدہ غاتے مون آتخسا فیصلہ کے۔
