اسلام آباد۔ 21 دسمبر (اے پی پی) صدر مملکت ڈاکٹر عارف علوی تعلیم و جان جوڑی نا آسراتی تا فراوانی آ زور شاغسا پارینے کہ مسلمان ملک آک پوسکن آ سائنسی علم انا تعلیم آ چکار کرسا دنیا ٹی تینا گوہنگوک آ ہند ءِ دوئی کننگ کیرہ، اواخلاق و علم انا جم آن دنیا ٹی مون آ بننگ کیرہ۔ داخیال آتا درشانی ءِ او دوشنبے نادے آ گلوبل الفارابی فورم نا بنائی دیوان آن تران کرسا کرے۔ صدر مملکت پارے کہ آخبت مسلمان تا نظر بننگ ءِ ولے اوفتے سخت خواری و مخلوق ءِ تعلیم و جان جوڑی نا فراوانی نا گرج ءِ۔ اوپارے کہ نن الفارابی نا اصول آتیا بایدے مون آ کان ہراکہ ساڑی حالیت آتا رداٹ عمل نا قابل ءِ۔ صدر مملکت پارے کہ دنیا اخلاقیات نا کنڈآ ہُپننگ ءِ ولے مسلمانک اخلاقیات نا خیال ءِ تخرہ و او اخلاقیات و علم انا بنداو آ بدلی اتنگ کیرہ۔ اواست ہسونی نا درشانی ءِ کرے کہ کشمیر، فلسطین و روہنگیا مسلمان تا حالیت زار خراب ءِ۔ مسلمانک سائنس و ٹیکنالوجی نا ترندی اٹ شونداری تون مون آ کار۔ مصنوعی ذہانت نا سوب علم اٹی ترندی اٹ ودکی مسنے۔ اواسلامی کمکار تنظیم نا قائمہ کمیٹی سائنس و ٹیکنالوجی کمکاری آ زور شاغا کہ او امت مسلمہ نا ورناتے ساڑی آ علم انا فراوانی ٹی تینا کڑد ءِ ادا کے۔ مسلمان فلسفی تا ستاءِ کرسا صدر مملکت پارے کہ مسلمان تا دور انا سوب یونانی فلسفہ ءِ پوسکن آ دنیا ٹی اتنگ اٹ کمک رسینگا۔ الفارابی ریاضی، طبعیات و سازوزیمل تون اوار ایلو بشخ آتیٹی اہم کڑد ادا کرے۔ اوپارے کہ الفارابی نا کتاب المدینتہ الفضیلہ ٹی ریاست مدینہ نا جوانی تے تالان کننگانے۔ وزیراعظم عمران خان پاکستان ءِ ریاست مدینہ نا اصول آتیا جوڑ کننگ کن متاماری کننگ ءِ۔ ریاست مدینہ ٹی غٹ ءِ بیربر حق دوئی ءِ۔ اوپارے کہ جان جوڑی و تعلیم نا آسراتی تا فراوانی آن مخلوق تعلیم یافتہ و جان جوڑ مریرہ تو داڑآن نیزگاری ءِ چٹفنگ اٹ کمک رسینگک۔ داوخت آ گپ وتران کرسا اسلامی کمکار تنظیم نا سائنس و ٹیکنالوجی نا امور نا اسسٹنٹ سیکرٹری جنرل عسکر مسی نوف پارے کہ اسلام اٹ تعلیم و سائنس ءِ نمان اہمیت تننگانے انتئے کہ دانا بناہی اقراغان مریک۔ اوپارے کہ پوسکن آ سائنس اٹ مسلمان اسکالرآتا اہم کڑد اسے و او سائنس نا کیہی بشخ آتیٹی بانی نا حیثیت تخرہ۔ اسلامی کمکار تنظیم نا چکار ءِ باسک ملک آتا یونیورسٹی تے سنٹر آف ایکسی لینس اٹ بدل کننگ کن آب اٹ نصاب اٹ گچینی آ مرکوز ءِ۔
