اسلام آباد۔ 21 دسمبر (اے پی پی) چیئرمین سینیٹ محمد صادق سنجرانی سینیٹر کلثوم پروین نا کزیت آ است ہسونی نا درشانی ءِ کرینے۔ دوشنبے نادے آ سینیٹ سیکرٹریٹ آن جاری بیان نا رداٹ سینیٹر کلثوم پروین کوویڈ۔ 19 ناسوب آن کزیت کرے۔ او تدوک آ کیہی ہفتہ غان درمان مسکہ۔ چیئرمین سینیٹ سینیٹر کلثوم پروین نا خاہوت تون گپ وتران کرسا پارے کہ او گودی کلثوم پروین نا کزیت آ بھاز افسردہ ءِ و ڈکھ انا داساہت اٹ اونا خاہوت نا غم اٹی بریبرنا شریک ءِ۔ سینیٹر کلثوم پروین نا کزیت آن ایوان بالا اسہ فعال باسک و شون پسند سوچ تخوک آ مدبر سیاست دان اسے آن محروم مس۔ صادق سنجرانی پارے کہ او نئے بیرہ بلوچستان اٹی پسماندہ تپہ غاتا پبی نمائندگی ءِ کرے بلکن ملکی سیاست اٹ ہم اہم کڑد ادا کرے۔ پاکستان اسہ مخلص و خواری کش سیاست دان اسے آن محروم مس۔ اوپارے کہ ایوان بالا ٹی اونا مثبت کڑد و الس کن اونا خذمت آتے مدام یات تخنگک۔ ایوان بالا غمزدہ خاہوت تون ڈکھ انا داساہت اٹ بریبر نا شریک ءِ۔ اللہ تعالیٰ ایماندار نا بخشش و اونا درجہ غاتے بڑز کے۔
