اسلام آباد۔ 10مارچ (اے پی پی) صدر مملکت ممنون حسین پارینے کہ پاکستان میانمر تون تعلقداری تے بھاز اہمیت ایتک، ہڑتوم آ ملک آتا نیام اٹ پارلیمانی و بڑزکو کہول انا ڈل انا کہول آ رابطہ غاتے پین ودفنگ نا گرج ئِ۔ صدر مملکت داہیت ئِ جمعہ نا دے ایوان صدر اٹی میانمر نا سبکدوش مروک آ سفیر وین نیگ تون اوڑدہی ٹی پارے ۔ اوپارے کہ میانمر نا جمہوریت نا کنڈآ پیش گامی خوش آئند ئِ۔ صدر مملکت پارے کہ جمہوریت نا مسخت امن و ایلمی ئِ مون آ دننگ نا ئِ و دانا زئم آک بایدے الس اسکان سرمریر ۔ صدر مملکت پارے کہ پاکستان میانمر اٹی جمہوریت نا پورومخ تفی ئِ کیک۔ اوپارے کہ ہڑتوم آ ملک آتا نیام اٹ پارلیمانی و بڑزکو کہول انا ڈل انا کہول آ رابطہ غاتے پین ودفنگ نا گرج ئِ تانکہ تعلقداری تیٹی پین ودکی مرے و زرکاری ہم ودے۔ صدر مملکت پارے کہ ہڑتوم آ ملک آتا نیام اٹ واپار لائخی آن کم ئِ ہراٹی بایدے ودکی کننگے۔ پاکستان خوائک کہ میانمر اٹی امن مرے و شونہالی برے۔ صدر مملکت میانمر نا سفیر تون ہیت وگپ کرسا پارے کہ داتاریخی ئُ حقیقت اسے کہ پاکستان نا اڈ ہلنگ آن پد غٹ آن مست میانمر نا سفیر (یو پی کن) قائد اعظم ئِ تینا سفارتی سند پیش کریسس۔ صدر مملکت دا اومیت نا درشانی ئِ کرے کہ او تینا ملک پدی ہنسا پاکستان نا مثبت تشخص ئِ تالان کیک۔ داوخت آ سبکدوش مروک آ سفیر وین نیگ پارے کہ او پاکستان و پاکستانی الس ئِ بھا ز اہمیت ایتک و اونا پاکستان اٹی اڈ کننگ یات گار سلک۔
