اسلام آباد۔ 10 مارچ(اے پی پی) صدر مملکت ممنون حسین پارینے کہ پاک چین اقتصادی راہداری و توانائی نا ڈٹ آتا پوروی آن کاروبار نا پوسکن آ کسر آک ملنگرہ و روزگارنا وارخواہی ملک ، حکومت زرکاری نا مون آ دننگ و سازگار کاروباری چاگڑد فراوان کننگ کن غٹ وسیلہ غاتے کاریم اٹ اتنگ ئِ۔ صدر مملکت داہیتئِ جمعہ نا دے ایوان صدر اٹی حاجی محمد افضل نا سروکی ٹی سیم چیمبر آف کامرس اینڈ انڈسٹری نا ڈل اتون اوڑدہی ٹی ہیت وگپ اٹی پارے ۔ اوڑدہی ٹی وزارت واپار و فیڈرل بورڈ آف ریونیو نا کمامدارآک ہم ساڑی ئسر۔ صدر مملکت پارے کہ ملک سہی سمت آ مون آ ہننگ ئِ و درست اقتصادی پالیسی تا سوب جہانی مالیاتی ادارہ غاک پاکستان ئِ معاشی وڑاٹ شونداری کروک آ ملک اس گوندانو۔ صدر مملکت پارے کہ کاروباری تپہ نا ویل آتا ایسری کن حکومت پبی گام گیج کننگ ئِ۔ وزارت واپار کاروباری تسلسل نا رداٹ مسہ سال اسٹریٹجک ٹریڈ پالیسی فریم ورک اسے نا پڑو کرینے ہراڑآن کاروبار اٹی ودکی مریک۔ اوپارے کہ دا پالیسی نا رداٹ پوسکن آ پلانٹ و مشینری نا درآمد و اوفتے خیبرپختونخوا، فاٹا و گلگت بلتستان تون اوار ایلو پسماندہ علاقہ غاتیٹی نصب کننگ آ 50 درسد اسکان کمک کننگک۔ صدر مملکت پارے کہ ٹریڈ ڈویلپمنٹ اتھارٹی پاکستان برآمد آتیٹی ودکی کن نمائش آتا بست و بند ئِ کننگ ئِ و واپاری ڈل انا دورہ ئِ ہم کرفنگ ئِ ہراڑآن زرکاری کن پوسکن آ ملک آتون رابطہ غاک ودرہ و برآمد آتیٹی ودکی مریک۔ صدر مملکت پارے کہ کاروباری و پوریاگر برادری ئِ تینا سلاہ ئی خراج تروئی مرے تانکہ داڑآن دوئی مروک آ کٹیا آن لس خلقت ئِ زیات آن زیات آسراتی فراوان کننگ مرے۔ سیم چیمبر آف کامرس اینڈ انڈسٹری نا صدر صدر مملکت ممنون حسین ئِ مون تروک ویل آتیان معلومدار کرے۔ اوحکومتی اقتصادی پالیسی تا ستائِ کرسا پارے کہ او ملک اٹی اقتصادی حالیت آتے گچین جوڑ کننگ کن حکومت تون رابطہ ٹی ئِ۔ داوخت آ سیم چیمبرآف کامرس اینڈ انڈسٹری نا صدر صدر مملکت ممنون حسین ئِ خیبر پختونخوا نا روایتی دستار اس بیرفے۔
