اسلام آباد۔ 18 دسمبر (اے پی پی) محکمہ موسمیات نا رداٹ بروک آ 24 گھنٹہ ٹی ملک انا گیشتر علاقہ غاتیٹی موسم یخ و پِرکپک وخت اس کہ بڑزکو علاقہ و قطبی بلوچستان اٹی موسم بھاز یخ مریک ولے پنجاب نا میدانی علاقہ و بڑزکو سندھ اٹی سہب و شام انا وخت آ گوتلو مننگ نا گمان ءِ۔ داٹی خطہ پوٹھوہار تون اوار پنجاب نا گڑاس میدانی علاقہ غاتیٹی سہب و شام انا وخت آ کہر مننگ نا ہم گمان ءِ۔ رپورٹ نا رداٹ تدوک آ 24 گھنٹہ ٹی ملک انا گیشتر علاقہ غاتیٹی موسم یخ و پِرکتو وخت اس کہ قطبی بلوچستان، قطبی علاقہ جاٹ، کشمیر و بڑزکو خیبرپختونخوا ٹی بھاز یخ مس۔ جمعہ نادے آ ریکارڈ کروک آ کم آن کم درجہ حرارت نا رپورٹ نا رداٹ لہہ ٹی درجہ حرارت منفی 15، استور منفی 12، کالام، اسکردومنفی 11، گوپس منفی 9، ہنزہ،بگروٹ منفی 8، گلگت منفی 7، مالم جبہ، دیر، قلات منفی 6، کوئٹہ، زیارت، ژوب، راولاکوٹ، مری و پاراچنار اٹی منفی 5 ڈگری سیںٹی گریڈ ریکارڈ کننگا۔
