اسلام آباد۔ 18 دسمبر (اے پی پی) پاکستان و متحدہ عرب امارات تعلقداری تا مون آ دننگ کن ادارہ جاتی میکنزم اس جوڑ کننگ آ امنا کرینو۔ داامنائی وزیر خارجہ مخدوم شاہ محمود قریشی نا دبئی ٹی متحدہ عرب امارات نا تینا ہم منصب شیخ عبداللہ بن زاید النہیان تون اوڑدہی ٹی مس۔ ترجمان دفترخارجہ نا رداٹ اوڑدہی ٹی ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا باندات آ گپ وتران کننگا۔ شاہ محمود قریشی پارے کہ پاکستان و متحدہ عرب امارات نا نیام اٹ، تاریخی، برادرانہ تعلقداری ءِ۔ یو اے ای ہر سخت انگا ساہت اٹ پاکستان تون تفینے۔ وزیر خارجہ تینا اماراتی ہم منصب ءِ مقبوضہ جموں و کشمیر اٹی امن و ایمنی نا خراب حالیت آتیان معلومدار کرے۔ ہڑتوم آ وزیر خارجہ غاتا نیام اٹ اوغانستان اٹی امن نا بابت داتم اسکان مون آ بروک آ مثبت پیش رفت آ ہم گپ وتران مس۔ مخدوم شاہ محمود قریشی پارے کہ پاکستان، اوغان امن عمل تون اوار ڈیہہ ٹی امن و سوگوی کن تینا مخلصانہ کوشست آتے برجاتخنگ کن سنبرینگوک ءِ۔ یو اے ای ٹی رہینگوک 16 لکھ انا خڑک پاکستانی تدوک آ کیہی دہائی آن متحدہ عرب امارات نا شونداری و شونہالی ٹی تینا کڑد ءِ ادا کننگ ءُ۔ شاہ محمود قریشی پارے کہ پاکستان و متحدہ عرب امارات نا نیام اٹ السی کہول آ رابطہ غاتا مون آ دننگ اٹ یواے ای ٹی رہینگوک پاکستانی کمیونٹی نا کڑد بھاز اہمیت تخک۔ وزیر خارجہ تینا ہم منصب ءِ یو اے ای ٹی رہینگوک آ پاکستانی کمیونٹی ءِ مون تروک مشکل آتیان معلومدار کرسا اوفتا زوت آن زوت ازالہ ءِ کننگ نا گرج آ زور شاغا۔ وزیر خارجہ کورونا دین اٹی پاکستان تون اوار مچ آ دنیا ٹی متحدہ عرب امارات نا کنڈآن تروک آ کمکاری ستاکڑزک۔ ہڑتوم آ وزیر خارجہ غاک پاکستان ومتحدہ عرب امارات نا نیام اٹ تعلقداری تا مون آ دننگ کن ادارہ جاتی میکنزم اس جوڑ کننگ آ امنا کریر۔ وزیر خارجہ تینا اماراتی ہم منصب ءِ دورہ پاکستان نا سلہ خلک ہرادے او خوشی اٹ امنا کرے۔ ہڑتوم آ وزیر خارجہ غاتا نیام اٹ تین پہ تینی است خواہی نا باندات آ سلابت نا چرجوئی ءِ برجاتخنگ آہم امنا کریر۔
