اسلام آباد۔ 18 دسمبر (اے پی پی) بنجائی وزیر داخلہ شیخ رشید احمد پڑو کرینے کہ حکومت ہر شاری ءِ اولیکو شناختی کارڈ ءِ مفت و 15 دے انا تہہ ٹی جاری کیک، پیشن نا ملک سفارتخانہ غاتیٹی پاسپورٹس و شناختی کارڈ انا جاری کننگ کن دفتر ملنگک، پی ڈی ایم سینیٹ نا گچین کاری تیٹی بشخ ہلیک، اپوزیشن ءِ استیفہ تروئی ءِ تو زوت ایتے، سینیٹ نا گچین کاری تیان پد عمران خان ءِ اکثریت رسینگا تو کرپٹ راہشون و منی لانڈرنگ کروک آتا چیہانٹ پیش تمک، استیفہ تسر و ضمنی گچین کاری کرفنہ۔ جمعہ نادے آ نادرا ہیڈ کوارٹر نا دورہ ءِ کننگ آن پد صحافی تتون گپ وتران کرسا وزیر داخلہ شیخ رشید پارے کہ نادرا حساس ءُ ادارہ سے ہرا گچین وڑاٹ تینا کاریم ءِ کننگ ءِ۔ ای پارت کرینٹ کہ ہفتہ و یک شنبے نادے آ نادرا ہیڈکوارٹر ءِ ملنگے۔50 پوسکن ءُ نادرا سینٹر 24 گھنٹہ یلہ مریرہ۔ غٹ تحصیل ہیڈکوارٹر آتیٹی نادرا دفتر جوڑ کننگک۔ اوپارے کہ حکومت فیصلہ کرینے کہ اولیکو شناختی کارڈ ءِ 40 انا جاگہ غا 15 دے اٹ مفت جاری کننگے۔ اوپارے کہ نادرا نا احساس پروگرام تون اوار چندی فلاحی پروگرام تیٹی ہم اہم ءُ کڑد اسے۔ نادرا نا 677 رجسٹریشن سینٹر و 16 ہزار ملازم ءُ۔ 3 ہزار نا خڑک کنٹریکٹ ملازم ءُ۔ نادرا غان کنٹریکٹ ملازم آتے کشنگپک۔ نادرا ریکارڈ نا رداٹ ملک اٹی 16 لکھ سلہہ لسین ءُ۔ اوپڑو کرے کہ ہر سفارتخانہ و پاکستانی مشن اٹ پاسپورٹس و شناختی کارڈ آتا جاری کننگ کن دفتر ملنگک۔ دا چرجوئی ٹی وزارت خارجہ غان کمک ہلنگک۔ اوپارے کہ سمندر پار پاکستانی تا ویل آتیان واقف اُٹ۔ اسہ اِرا تُو اٹی اوفتا ویل آتا ایسری کن اہم پیش رفت مریک۔ کوشست کننگ اُن کہ پاسپورٹ،آئی ڈی کارڈ آتا جاری کننگ تون اوار اوفتا ویل آک اسہ چھت انا کیرغ آن ایسر مریر۔ اوپارے کہ داوخت آ بیرہ 10 نادرا دفتر ٹونٹی فور سیون کاریم کننگ ءُ۔ اوفتا کچ ءِ ودفسا 50 کننگک۔ ہنداوڑ موبائل وین تا کچ ءِ 200 آن ودفسا 300 کننگک تانکہ مر مُر و پسماندہ علاقہ غاتا الس ءِ ہم آسراتی فراوان مننگ کے۔ اوپارے کہ جعلی شناختی کارڈ اسہ اہم ءُ ویل اسے۔ دانا ایسری کن ہم گام گیج کننگک۔ اسہ سوج اسے نا ورندی ٹی اوپارے کہ پی ڈی ایم ءِ سینیٹ گچین کاری تیٹی بشخ ہلوک خننگ اُٹ۔ اگہ اپوزیشن سینیٹ نا گچین کاری تیٹی بشخ ہلپننگ و استیفہ تروئی ءِ تو اودے انت پرخ تمک کہ گچین کاریک چوخت مریرہ۔ 12 فروری آن پد سینیٹ نا گچین کاریک مننگ کیرہ۔ وڑوڈول انت مریک داڑکن سپریم کورٹ تون رابطہ کننگک۔ اپوزیشن ءِ سلہ ایتیوہ کہ اگہ اسلام آباد آ بروئی ءِ تو ببو ہرادے عمران خان سینیٹ نا گچین کاری تیٹی اکثریت دوئی کرے تو کرپٹ و منی لانڈرنگ کروک آتا چیہانٹ پیش تمک۔ اسہ سوج اسے نا ورندی ٹی اوپارے کہ برطانیہ تون معاہدہ مفننگ نا سوب آن نواز شریف و اسحاق ڈار ءِ وطن آ اتنگ کتون۔ اوپارے کہ پی ڈی ایم نا راہشونک دین انا فکر ءِ کیر و الس نا زند ءِ خطرہ ٹی شاغپس ولے اگہ اوفتے اسلام آباد آبروئی ءِ تو بریر۔ استیفہ تروئی ءِ تو ایتر، اوفتا سیٹ آتیا ضمنی گچین کاری کرفنہ۔
