اسلام آباد۔ 18 دسمبر (اے پی پی) وزیراعظم نا خصوصی کمکار موسمیاتی بدلی ملک امین اسلم پارینے کہ وزیراعظم عمران خان نا ٹین بلین ٹری سونامی پروگرام نا رداٹ پاکستان نا کرکی علاقہ غاتیٹی اسہ ارب مینگروز نا درخت خلنگک۔ دا بابت جامع ڈٹ انا تیاری آ کاریم نا بناءِ کننگانے۔ جمعہ نادے آ تینا اسہ بیان اسے ٹی اوپارے کہ اسہ ارب مینگروز نا درخت بلوچستان و سندھ انا کرکی علاقہ غاتیٹی خلنگک۔اسہ ارب مینگروز نا درخت خلنگ نا بابت جامع ڈٹ انا تیاری آ کاریم نا بناءِ کننگانے۔ ملک امین اسلم پارے کہ اسہ جہانی ماحولیاتی تنظیم نا تازہ پٹ وپول نا رداٹ تدوک آ 30 سال اٹی پاکستان اٹ مینگروز جنگلات آتیا تالان رقبہ ٹی چندی چاگڑد دوست گام گیج آتا سوب 300 گنا ودکی مسنے۔ اوپارے کہ ملک اٹ دا جنگل آتا رقبہ ٹی پین ودکی کننگ کن جہانی بینک انا کمک اٹ وزارت موسمیاتی بدلی بلوکاربن ایکو سسٹم اسٹریٹجی جوڑ کننگ آ کاریم نا بناءِ کرینے۔ ملک امین اسلم پارے کہ دا ڈٹ انا خاص مسخت مینگروز جنگل آتا رقبہ ٹی ودکی کرسا جہانی حدت نا سوب مروک آ زیاری گیس آتا اخراج اٹ کمتی اتنگ ناءِ۔ بلوکاربن ایکو سسٹم ڈٹ مینگروز جنگل و اوفتا کاربن گیس آتے تینا تہہ ٹی جذب کننگ نا بابت زرگزرانی کساس خلنگ اٹ اہم مریک۔ ملک امین اسلم پارے کہ مینگروز جنگلات چاگڑد دشمن زیاری گیس آتے کم کننگ اٹ ایلو وڑتا جنگل آتا بہ نسبت پنچ گنازیات کم کیک۔ پاکستان نا کرکی علاقہ غاک جہانی حدت اٹ ودکی نا سوب چندی ماحولیاتی و موسمیاتی خطرہ غاتیان دوچار ءُ۔ اوپارے کہ مینگروز نا جنگل آک سمندری طوفان تا توننگ و اوفتا شدت اٹ کمتی اتنگ تون سمندری کہول اٹ ودکی ءِ کم کننگ اٹ بھاز گیچن پک مریک۔
