اسلام آباد۔ 18 دسمبر (اے پی پی) وزیر خارجہ مخدوم شاہ محمود قریشی دبئی ٹی پاکستانی قونصل خانہ نا دورہ ءِ کرے۔ قونصل خانہ غا سرمننگ آ دوبئی ٹی تعینات پاکستان نا قونصل جنرل احمد امجد علی و قونصل خانہ نا سینئر آفیسر آک وزیر خارجہ ءِ بخیر کریر۔ قونصل جنرل دبئی احمد امجد علی قونصل خانہ نا کارکڑد نا بابت وزیرخارجہ ءِ معلومدار کرسا پارے کہ قونصل خانہ کورونا نا دین اٹی وطن آ پدی ہِننگ نا چاری 58،500 پاکستانی تے وطن آ پدی گدریفے۔ 4600 ہندن ءُ پاکستانی ہرافتے تون ملازمت نا چٹنگ نا سوب آن وسیلہ الوکہ اوفتیکن ٹکٹ و سفری خڑچ آتا بست وبند کرے۔ کورونا نا دین اٹی دبئی قونصل خانہ 17500 راشن بیگ بشخا و 359 میت آتے پاکستان آ گدریفنگ نا بست وبند کرے۔ وزیر خارجہ پارے کہ مچ آ دنیا ٹی رہینگوک آ پاکستانی شاری تا راجی آسراتی و اوفتے مون تروک ویل آتا اولیتی بنداو تیا ایسری، ننا حکومت نا اولیت آتیٹی اوار ءِ۔ وزیر خارجہ قونصل جنرل ءِ پارت کرے کہ او اقتصادی سفارتکاری ءِ کاریم اٹ اتسا، دبئی نا زرکار آتے پاکستان اٹ ساڑی زرکاری نا گچین وارخواہی تیان جوان وڑاٹ روشناس کرفر۔ وزیر خارجہ قونصل خانہ ٹی ساڑی وزیٹر بک اٹ تینا تاثر آتے ہم نوشتہ کرے۔ وزیر خارجہ قونصل خانہ نا چندی بشخ آتا دورہ ءِ کرے و الس ءِ تروک آ آسراتی تیا است جمی نا درشانی ءِ کرے۔
