اسلام آباد۔ 17 دسمبر (اے پی پی) بنجائی وزیر داخلہ شیخ رشید احمد پارینے کہ امن و ایمنی ٹی پولیس صف اول نا دستہ ءِ، اسلام آباد نا تھانہ غاتیٹی شاری تے شرف ملک۔ مسہ ناکہ غان بیدس غٹ ناکہ غاتے چٹفنگک، پولیس نا تنخواہ تیٹی ودکی کینہ، اکاموڈیشن کن جاگہ اس فراوان کینہ، شو آف ہینڈز انا کمک اٹ سینیٹ گچین کاری تیان دھاندلی و وونٹ بہا مننگ نا ویل ایسر مریک۔ پنچ شنبے نادے آ پولیس لائنز نا دورہ ءِ کننگ نا وخت آ صحافی تتون گپ وتران کرسا وزیر داخلہ پارے کہ وزیراعظم ءِ اسلام آباد پولیس نا پاسنگ آؤٹ نا دود اٹی بشخ ہلنگ نا سلہ خلکونن۔ اسلام آباد پولیس نا تنخواہ کم ءِ۔ تنخواہ و آسراتی تیٹی ودکی کننگک۔ پولیس ءِ اکاموڈیشن کن جاگہ اس فراوان کننگک۔ 800 کینال ڈغار فراوان کننگ نا سلاہ ءِ۔ پولیس کن فنڈ آتیٹی ودکی کننگک، پولیس ءِ پین فنڈ آتا گرج ءِ۔ اسلام آباد اٹی ڈوہ تیٹی 30درسد کمتی بسنے، بنجائی دارالحکومت ءِ سیف سٹی اس جوڑ کننگک۔ اوپولیس نا شہید آتے خراج عقیدت پیش کرے وپارے کہ اسلام آباد پولیس ءِ پین گچین کننگک۔ فرانزک لیب ہم جوڑ کننگک۔ اوپارے کہ سرینا، مارگلہ و میریٹ آن بیدس غٹ ناکہ غاتے چٹفنگک، پولیس ءِ پٹرولنگ کن پین گاڈی تننگک۔ وزیر داخلہ پارے کہ اگہ سپریم کورٹ موکل تس تو سینیٹ گچین کاری شوآف ہینڈ انا کمک اٹ کرفنہ۔ داڑآن وونٹ آتا ہلنگ و بہا کننگ و دھاندلی چٹک و شفافیت بریک۔ اسہ سوج اسے نا ورندی ٹی اوپارے کہ پگہ نادرا نا دورہ ءِ کیوہ و ہندن ءُ نظام اس جوڑ کینہ کہ پاکستانی پاسپورٹ و شناختی کارڈ نا عزت مرے۔ ایلو ملک آتیٹی بند پاکستانی شاری تا ویل ءِ ہم ایسر کینہ۔ اوپارے کہ او اسلام آباد ٹریفک پولیس نا کارکڑد آن است جم اُن۔ داکان مست وزیر داخلہ شیخ رشید احمد پولیس لائنز ہیڈ کوارٹر آ سرمس ہراڑے او یات گار شہداء آ پھل شاغا و شہید آتیکن دعاپاتیا کرے۔ وزارت داخلہ نا زمواری ءِ سنبھالنگ آ دا بنجائی وزیر نا پولیس لائن ہیڈکوارٹر نا اولیکو دورہ ئس۔ آئی جی اسلام آباد محمد عامر ذوالفقار خان وزیر داخلہ شیخ رشید احمد ءِ اسلام آباد پولیس نا کارکڑد و امن و ایمنی نا حالیت آتا بابت حوال تس۔ سیکرٹری داخلہ یوسف نسیم کھوکھر ہم حوال اٹی ساڑی ئسک۔
