اسلام آباد۔ 10 مارچ (اے پی پی) قومی اسمبلی ئِ پاننگانے کہ وزیراعظم یوتھ لون نا رداٹ کڑز میرٹ آ جاری کننگک، ملک انا ہر چار آ صوبہ غاتیان ورناک داڑکن درخواست تسنو وخت اس کہ فاٹا نا کنڈآن داوخت اسکان داپروگرام نا رداٹ ہچ ئُ درخواست اس رسینگ تنے۔ جمعہ نا دے قومی اسمبلی ٹی وقفہ سوج آتیٹی شیخ صلاح الدین نا سوج انا ورندی ٹی پارلیمانی سیکرٹری خزانہ رانا محمد افضل خان پارے کہ وزیراعظم یوتھ لون پروگرام ورناتے تینا کاروبار نا کنڈآراغب کننگ نا پروگرام ئِ۔ فاٹاآن دابابت ہچ ئُ درخواست اس رسینگ تنے۔ ایلو صوبہ غاتیان درخواست آک رسینگانو۔ بینک آک پٹ وپول آن پد کڑز تروئی تمک۔ اسہ پین ضمنی سوج اسے نا ورندی ٹی اوپارے کہ ایف بی آر نا کنڈآن خراج گزار آتا آسراتی کن مچ آ ملک اٹی سینٹر اڈتننگانے ہراکان خراج گزار آتے راہشونی فراوان کننگک۔ اوپارے کہ خراج نا ادائیگی نا نظام ئِ زیات آن زیات سادہ و سہل جوڑ کننگ انگ ئِ ۔ داسہ خلقت آن لائن خراج گواشوارے جمع کرفیرہ ہرانا سوب آن اوفتے خراج دفتر آتا دکہ کنوئی تمپک و داٹی کرپشن نا عنصر ہم پدریسہ چٹنگ ئِ۔ اومیت ئِ حالیت بھاز گچین مریک۔
