اسلام آباد۔ 17 دسمبر (اے پی پی) صدر مملکت ڈاکٹر عارف علوی پارینے کہ افراد باہم معذوری کن کمکار ٹیکنالوجی نا جہانی و علاقائی کہول آ است بڈی ءِ کننگ انگ ءِ، خصوصی بندغ آتا کمکار ٹیکنالوجی اسکان رسینگ اٹ گچینی اتنگ و مالی و راجی وڑاٹ قومی دنگ اٹ شریک کننگ کن گام گیج کننگ اُن۔ داخیال آتا درشانی ءِ او پنچ شنبے نادے آ تینا کماشی ٹی کمکار ٹیکنالوجی افراد باہم معذوری آ دیوان آن تران کرسا کرے۔ دیوان اٹی جہانی ادارہ جان جوڑی نا نمائندہ، ڈاکٹر پلیتھا ماہی پالا و ایم ڈی پاکستان بیت المال، عون عباس بپی بشخ ہلکر۔ دیوان اٹی جہانی ادارہ جان جوڑی و بنجائی وزارت جان جوڑی نا بڑزکو کمامدارآک ہم ساڑی ئسر۔ ڈاکٹر پلیتھا ماہی صدرمملکت ءِ کمکار ٹیکنالوجی افراد باہم معذوری آ سرجم حوال تس۔ دیوان ءِ کمکار ٹیکنالوجی نا بابت جہانی ادارہ جان جوڑی نا گام گیج آتا بارواٹی ہم حوال تننگا۔ اعلامیہ نا رداٹ کمکار ٹیکنالوجی افراد باہم معذوری ءِ بصارت، سماعت، نقل و حرکت تون اوار شش بنداوی خذمت فراوان کیک۔ دیوان آن تران کرسا صدر مملکت ڈاکٹر عارف علوی پارے کہ افراد باہم معذوری و غیر متعدی مرض آتیان زہمی بندغ آتسکان پوسکن آ ٹیکنالوجی نا فائدہ غاتے سرکننگ نا گرج ءِ۔ اوپارے کہ افراد باہم معذوری اسکان کمکار ٹیکنالوجی نا رسینگ ءِ گچین کرسا اوفتے مون تروک چیلنج آتون مون تننگ مریک۔ افراد باہم معذوری کمکار ٹیکنالوجی نا کاریم اٹ اتنگ آن تینکن آسانی ودکی کننگ کیرہ۔ اوپارے کہ افراد باہم معذوری کن کمکار ٹیکنالوجی ءِ جہانی و علاقائی کہول آ است بڈی دوئی مننگ ءِ۔ صدر مملکت پارے کہ خصوصی بندغ آتا کمکار ٹیکنالوجی اسکان رسینگ اٹ گچینی اتنگ و مالی و راجی وڑاٹ قومی دنگ اٹ شریک کننگ ہم گام گیج کننگ اُن۔ صدر مملکت ڈاکٹر عارف علوی کمکار ٹیکنالوجی افراد باہم معذوری آ جہانی کمکاری ءِ ودفنگ آ جہانی ادارہ جان جوڑی نا کوشست آتا ستاءِ کرے۔
