پشاور۔ 16 دسمبر (اے پی پی) وزیراعظم پاکستان عمران خان پارینے کہ حکومت نا وسیلہ غاک محدود ءُ و حکومتی کٹیا نا نیمہ بشخ وام تا زرتس اٹی کاہک ہرانا سوب آن حکومت کن مچ آ ملک انا ہر علاقہ ٹی پوسکن آ ہسپتال آتا جوڑ کننگ سرکاری فنڈ آن ممکن اف، داوڑاٹ اگہ اسہ کنڈآ پرائیویٹ ہسپتال آتا جوڑ کننگ نا است بڈی ءِ کننگے و ایلو کنڈآ جان جوڑی آسراتی کارڈ کون آ اسکیم تا رداٹ الس ءِ سرکاری خڑچ آ نجی ہسپتال آتیٹی درمان نا پوسکن ءُ آسراتی فراوان کننگے تو دا ملک انا الس نا فائدہ غاتیٹی ءِ۔ او چارشنبے نادے آ پشاور انسٹیٹیوٹ آف کارڈیالوجی (پی آئی سی) نا بناءِ کننگ آن پد گپ وتران کریکہ۔ اوپارے کہ حکومت مچ آ ملک خاص کر پسماندہ علاقہ غاتیٹی نجی ہسپتال آتا جوڑ کننگ کن پرائیویٹ سیکٹر نا است بڈی ءِ کننگ ءِ۔ و دا ہسپتال آتا جوڑ کننگ کن سرکاری ڈغار خاص کر وقف املاک اڑزآن بہاآ فراوان کننگ انگ ءِ تانکہ نجی بشخ پسماندہ علاقہ غاتیٹی پوسکن آ ہسپتال آتا جوڑ کننگ اٹ است خواہی ہلے و دا علاقہ غاتا نیزگار الس ءِ اوفتا درگہ غا درمان نا آسراتی دوبننگ کے۔ داکان بیدس طبی بشخ اکن درکارازباب آتا درآمدءِ ڈیوٹی فری ہم کننگانے۔ اوصوبہ ٹی جان جوڑی آسراتی کارڈ کون آ فقید المثل اسکیم درستی راستی کرفنگ و پشاور انسٹیٹیوٹ آف کارڈیا لوجی نا پوروی آ صوبائی حکومت ءِ خراج تحسین پیش کرے۔ اوپارے کہ دُن تو جان جوڑی آسراتی کارڈ اسکیم نا رداٹ سرکاری ہسپتال آتون اوار اوار نجی ہسپتال آتیٹی ہم سرکاری خڑچ آ نیزگار ناجوڑ آتے درمان نا آسراتی فراوان کننگ انگ ءِ ہنداخاطرآن داسہ نجی بشخ صوبہ نا پسماندہ علاقہ غاتیٹی ہم ہسپتال آتا جوڑ کننگ آ چکار کننگ ءِ و اگہ داٹی حکومت نا کنڈآن نجی ہسپتال آتا جوڑ کننگ کن پرائیویٹ بشخ ءِ آسراتی تننگک تو دا ہسپتال آتے زوت تفنگ مریک و جان جوڑی آسراتی کارڈ کون آ اسکیم تیان فائدہ ہرفوک آ ناجوڑ آتے درمان نا بابت زیات آن زیات آسراتی دوبننگ کیک۔ وزیراعظم پارے کہ ہرافک حکومت آ تنقید کیرہ کہ ریاست مدینہ نا قیام بیرہ اسہ نعرہ اسے اوفک اُریر کہ جان جوڑی آسراتی کارڈ کون آ آسراتی ریاست مدینہ کون آ فلاحی ریاست نا کنڈآن اسہ عملی گام اسے۔ اوپارے کہ ریاست مدینہ اولیکو اسلامی فلاحی ریاست ئس۔ ہرا نیزگار و اختہ مروک آ تپہ نا ویل و مشکل آتا ایسری ءِ اولیت تس و پاکستان نا ساڑی حکومت ہم ہمو نظریہ نا رداٹ مون آ ہِننگ ءِ ، اوپشاور انسٹیٹیوٹ آف کارڈیالوجی نا جوڑ کننگ ءِ ہم جان جوڑی نا بشخ اٹ اسہ اہم ءُ پیش رفت اس گوندسا پارے کہ دا انسٹیٹیوٹ نا جوڑ کننگ آن نئے بیرہ خیبرپختونخوا بلکن اوغانستان نا ہمو ناجوڑ آتے ہم گچین طبی آسراتی دوبریک ہرااست انا ناجوڑی تیٹی اختہ ءُ۔ اوپارے کہ دا بھلو بدبختی اس ئس کہ خیبرپختونخوا ٹی داتم اسکان است انا مرض اکن داوڑنا انسٹیٹیوٹ الوکہ و ساڑی صوبائی حکومت کچ اٹنگا وسیلہ و کورونا غان ودی مروک آ حالیت کون آ چیلنج آتیان پد ہم فنڈ آتا فراوانی ءِ پک کرسا پشاور انسٹیٹیوٹ آف کارڈیالوجی نا پوروی ءِ پک کرے۔ ہراڑکن خیبرپختونخوا حکومت نا اخس کہ سفت ءِ کننگے کم ءِ۔ اوپارے کہ مچ آ دنیا ٹی است و کینسر نا مرض آتیٹی اختہ ناجوڑ آتا مرک آتا کچ غٹ آن زیات ءِ ہنداخاطرآن پشاور انسٹیٹیوٹ آف کارڈیالوجی کون آ ادارہ نا جوڑ کننگ المی ئس۔ اوپارت کرے کہ دا انسٹیٹیوٹ اٹ تروک آ پوسکن آ آسراتی تا آب ءِ برقرار تخنگے انتئے کہ عموما سرکاری بشخ اٹ جوڑ مروک آ ہسپتال آتا آب ءِ برقرار تخپننگ آن ہمو ہسپتال آتا کارکڑد ءِ تنزلی نا گواچی مرسا ہُننگانے۔ ہنداخاطرآن دا المی ءِ کہ ہرا طبی مرکز ہم سرکاری بشخ اٹ جوڑ مرے اونا آب ءِ برقرار تخنگ و اودے گچین آن گچین کننگ آ خصوصی چکار کننگے۔ وزیراعظم داوخت آ اسلام آباد نا پمز ہسپتال اٹ اصلاحات نا عمل نا برخلاف برانز کروک آ طبی عملہ ءِ مخاطب کرسا پارے کہ حکومت نا طبی بشخ و ہسپتال آتیٹی اصلاحات نا مسخت پرائیویٹا ئزیشن اف بلکن دا اصلاحات نا مسخت ہسپتال آتیٹی جزا و سزا نا نظام ءِ درستی راستی کرفنگ و مینجمنٹ سسٹم اٹ گچینی اتنگ نا ءِ انتئے کہ جزا و سزا نا نظام مفننگ نا سوب آن سرکاری بشخ اٹی جوڑ ہسپتال آتا کارکڑد آ منفی زہم تمانے و اوفتیان الس نا پت ہِننگ ءِ۔
