وزیر مملکت داخلہ بلیغ الرحمان نا ایوان بالا ٹی وقفہ سوج آتیٹی ورندی
اسلام آباد۔ 10مارچ (اے پی پی) وزیر مملکت داخلہ بلیغ الرحمان پارینے کہ دہشت گرد و دہشت گرد تنظیم آتے پیسہ غاتا فراوانی ئِ توننگ کن چندی گام گیج کننگانے، نیشنل ایکشن پلان نا رداٹ ایف آئی اے حوالہ و ہنڈی نا برخلاف کارروائی کننگ ئِ، مشکوک ترسیلات زر انا رپورٹ آ ایکشن ہلنگک۔ ٹاسک فورس این جی او و خیراتی ادارہ غاتا چاروکی کن جامع کانود سازی کن مسودہ اس تیار کیک۔ جمعہ نا دے ایوان بالا ٹی وقفہ سوج آتیٹی سینیٹر سحر کامران نا سوج انا ورندی ٹی وزیر مملکت داخلہ انجینئر بلیغ الرحمان ایوان ئِ پارے کہ نیشنل ایکشن پلان نا رداٹ دہشت گرد و دہشت گرد تنظیم آتے پیسہ غاتا فراوانی ئِ توننگ کن چندی گام گیج کننگانے۔ دا چرجوئی ٹی بینک آتیان پیسہ غاتا ترسیل آ سخت نظر تخنگ انگ ئِ ۔ 4461اکاﺅنٹ آتے بند کننگا ہرافتا جاست وپاست کننگ انگ ئِ ۔ دااکاﺅنٹ آتیٹی 40 کروڑ روپئی نا زرئس۔ اوپارے کہ نیشنل ایکشن پلان نا رداٹ 1865دہشت گرد خلنگانو، 5611دزگیر مسنو وخت اس کہ 414ئِ پاہو تننگانے۔ اوپارے کہ سٹیٹ بینک غٹ بینک آتے پارت کرینے کہ او بائیو میٹرک مشین نصب کیر تانکہ صارف آک دمدستی پک مننگ کیر ۔ دا گام آن بے پنی اکاﺅنٹ ملنگ نا گمان آک چٹرہ۔
