وزیراعظم محمد نواز شریف نا وزارت مذہبی امور ءِ حج 2017ء کن بست و بند آتے پین گچین جوڑ کننگ و حاجی تے زیات آن زیات آسراتی تا فراوانی ءِ المی جوڑ کننگ نا پارت

اینخو سال اسہ لکھ 89 ہزار 210 پاکستانی حج انا فرض انا سعادت ءِ حاصل کیرہ، وزیراعظم ءِ بریفنگ
اسلام آباد۔ 09مارچ (اے پی پی) وزیراعظم محمد نواز شریف وزارت مذہبی امور و بین ہم آہنگی ءِ پارت کرینے کہ حج 2017ء کن بست و بند آتے پین گچین جوڑ کننگے و حاجی تے زیات آن زیات آسراتی تا فراوانی ءِ المی جوڑ کننگے۔ پنچ شنبے نا دے وزارت مذہبی امور نا کنڈآن حج 2017 ء نا بابت وزیراعظم ءِ بریفنگ ترسا بنجائی وزیر مذہبی امور سردار محمد یوسف پارے کہ وزیراعظم نا پارت نا رداٹ گدرینگوک آمسہ سال اٹی حج بست و بند آتیٹی بھاز جوانی بسنے۔ وزیراعظم محمد نواز شریف حاجی تے آسراتی تا فراوانی کن وزیر مذہبی امور نا سروکی ٹی وزارت مذہبی امور نا کارکڑد نا ستاءِ کرے وپارے کہ گچینی نا گنجائش ہمیشہ ساڑی مریک اووزارت مذہبی امور ءِ پارت کرے کہ حج بست و بند آتے پین آرام دہ ، جوان و ہڑزان جوڑ کننگے۔ اوپارے کہ راج انا غٹ تپہ غاک گدرینگوک آ مسہ سال اٹی جوانی محسوس کرینو۔ وزیراعظم ءِ پاننگانے کہ سعودی عرب تون سالانہ حج معاہدہ 2017ء کننگانے۔ اوپارے کہ حرم شریف نا ودیکی نا سوب 2013ء ٹی حج کوٹہ ٹی ہراکمتی کننگاسس اودے چٹفنگانے ہنداوڑ اسہ لکھ 43ہزار 368 پاکستانی آن بیدس اسہ لکھ 89 ہزار 210 پاکستانی اینخو سال حج انا فرض ءِ ادا کیرہ۔