اسلام آباد۔ 09مارچ (اے پی پی) دفترخارجہ پارینے کہ پاکستان و اوغانستان اواری اٹ دہشت گردی نامون ءِ توننگ کیرہ۔ سیمی انتظام و انصرام ہڑتوم آ ملک آتا فائدہ ٹی ءِ۔ پاکستان قومی سلامتی کن کم از کم دفاعی لائخی ءِ برقرار تخک۔ 13می اقتصادی کمکار تنظیم سروک دیوان اٹی کشمیر نا معاملہ ءِ پبی وڑٹ چست کننگا، پاک اوغان سیم ءِ بند کننگ نا فیصلہ ملکی سلامتی ءِ مون آ تخسا کننگا۔ پنچ شنبے نا دے دفترخارجہ نا ترجمان محمد نفیس ذکریا ہفتہ وار پریس بریفنگ اٹی صحافی تا جتا سوج آتا ورندی ءِ ترسا پارے کہ بھارت مچ آ دنیا ٹی سلہہ غاتا ہلوک آ غٹ آن بھلا ملک جوڑ مسنے ولے پاکستان ڈیہہ ٹی واک انا توازن و کم از کم دفاعی لائخی ءِ برقرار تخک۔ ترجمان پارے کہ بحر ہند اٹی بھار ت نا ایٹمی سرجزآک ڈیہہ و جہانی کہول آ باعث تشویش ءُ و جہانی ادارہ نیو کیلئر سپلائرز گروپ نا رکنیت تننگ نا وخت بھارت نا غیر معمولی ایٹمی و دفاعی سرجزآتے مون آ تخے۔ پاک اوغان سیم انا بندش نا بابت سوج انا ورندی ءِ ترسا ترجمان پارے کہ پاکستان ءِ اوغانستان تون سیم بند کننگ آ بیوس کننگا، لاہور ، مہمند ایجنسی و چارسدہ ٹی کروک آ دہشت گرد جلہو آتا زمواری ءِ جماعت الحرار و تحریک طالبان امنا کریسر ہرافتا اوغانستان اٹی رکھوک ہندآک ءُ۔ پاکستان ملکی سیکورٹی ءِ مون آ تخسا اوغان سیم ءِ بند کرے انتئے کہ ملکی سیکورٹی نن کن غٹ آن مقدم ءِ۔ ترجمان پارے کہ دا معاملہ ءِ کیہی وار اوغان کمامدارآتون چست کننگا ولے دارڑتا برخلاف ہچ ءُ کارروائی اس متو۔ ترجمان پارے کہ بارڈر مینجمنٹ اہم ءُ معاملہ اسے، پاکستان و اوغانستان اواری اٹ دہشت گردی نا مون ءِ توننگ کیرہ۔ سعودی عرب اٹی پاکستانی خواجہ سراہ تا دزگیری نا بابت اسہ سوج اسے نا ورندی ءِ ترسا ترجمان پارے کہ سعودی پولیس نا بیدادی آن خواجہ سراتا تپاخت اٹی ہچ ءُ راستکی اس اف۔ اوپارے کہ خواجہ سرااست انا دورہ تمنگ آن تپاخت کرینے وخت اس کہ ایلوفتے ہم ہندی کانود نا خلاف ورزی آ دزگیر کننگا۔ ایکو سروک دیوان نا بابت سوج انا ورندی ءِ ترسا ترجمان پارے کہ سرسہب سروک دیوان اٹی چندی سروک مملکت و حکومتی سروک آک شرکت کریر و سی پیک نا خیرمقدم ءِ کریر۔ اوپارے کہ سمٹ اٹی ہڑتوم آ کنڈآتا مذاکرات اٹی کشمیر نا معاملہ ءِ پبی وڑاٹ چست کننگا۔ ترجمان پارے کہ بھارت دزگیر اِرا پاکستانی چناتے (اینو) جمعہ نا دے پاکستان ناحوالہ کیک۔
