اسلام آباد۔ 09مارچ (اے پی پی) صدر مملکت ممنون حسین پارینے کہ پاکستان و ترکی ہمیشہ پناہ گزین تا ویل آتا ایسری کن مثبت گام گیج کرینو ، ہڑتوم آ برادر ملک پین وخت اس ہم تین پہ تینی کمکاری اتون انسانیت نا خذمت ءِ کرسا کیرہ۔ اوداہیت ءِ پنچ شنبے نا دے پاکستان ہلال احمر نا کنڈآن ترکی ٹی رہینگوک شامی مہاجر آتے امدادی گڑاتا فراوانی نا وخت آ ایوان صدر اٹی اڈ ہلوک آ بریفنگ اٹی ہیت وگپ کرسا پارے ہراٹی ترکی نا سفیر پاکستان صادق بابر گرگن ، پاکستان ہلال احمر نا چیئرمین ڈاکٹر سعید الٰہی و ایلوبڑزکو کمامدارآک ساڑی ئسر۔ داوخت آ ہلال احمر نا چیئرمین سعید الٰہی امدادی گڑاتا فراوانی نا بابت صدر مملکت ءِ بریفنگ تس۔ صدر مملکت پار ے کہ ترکی 30 لکھ آن زیات شامی مہاجر آتے تینا گل زمین آ پناہ ترسا یورپی و ایلو ملک آتے کن مثال اس قائم کرینے۔ اودااومیت نا درشانی ءِ کرے کہ پاکستان ہلال احمر نا کنڈآن تروک آ شامی مہاجر آتا ویل آتا کمتی نا سوب جوڑ مریک۔ اوپاکستان ہلال احمر نا کنڈآن تروک آ امداد نا گام و انسانیت نا خذمت کن کروک آ کوشست آتا ستاءِ ہم کرے۔ صدر مملکت مستی پارے کہ پاکستان و ترکی نا برادرانہ تعلقداری عقیدت، دودوربیدہ و تاریخی میرات اتون گنڈوک ءُ۔ترکی نا کنڈآن پاکستان اٹی 2005ء و 2008 ء نا زمی جمب نا وخت آ تروک آ امداد ہم ستاکڑزک۔ دود اٹی ترکی نا سفیر پاکستان صادق بابر گرگین حکومت پاکستان نا شامی مہاجر آتے کن امدادی گڑاتا فراوان کننگ آ منت واری ءِ ادا کرے۔
