اسلام آباد۔ 09 مارچ (اے پی پی) صدر مملکت ممنون حسین پارینے کہ دہشت گردی نا چٹفنگ کن پاک۔ امریکہ کمکاری اہم ءِ ، دہشت گردی ہراکہ دروشم اٹی مرے پاکستان ہمیشہ مذمت ءِ کرینے۔ داخیال آتا درشانی ءِ او پنچ شنبے نا دے امریکہ ٹی پندار پاکستانی سفیر اعزاز احمد دچوہدری تون ایوان صدرا ٹی اوڑدہی ٹی کرے۔ صدر مملکت امریکہ ٹی بطور سفیر تعیناتی آ اعزاز احمد چوہدری ءِ مبارکبادی تس۔ اودا اومیت نا درشانی ءِ کرے کہ اونا دوراٹی پاکستان و امریکہ نا تعلقداریک پین سوگو مریرہ۔ صدر مملکت پارے کہ امریکہ تون پاکستان نا تعلقداریک بھاز اہم ءُ۔ صدر مملکت پارے کہ او پاکستان نا روشن تشخص ءِ تالان کننگ کن تینا آزموندہ غاتے کاریم اٹ اتے و امریکی زرکار آتے پاکستان اٹی زرکاری کن راغب کے۔ صدر مملکت پارے کہ پاکستان اٹی زرکاری نا بے پناہ وارخواہی ارے ہرافتیان پیشن نا زرکارآک فائدہ ہرفنگ کیرہ۔ اوپارے کہ دنیا ٹی داوخت ترندی اتون بدلی بننگ ءِ ہرافتیان فائدہ ہرفنگ کن واقعہ عالم نا معروضی تجزیہ کرسا ملک وقوم انا مفادا ٹی فیصلہ کروئی ءِ۔ داچرجوئی ٹی سفارتی مشن آتا زمواری غیر معمولی ءِ۔ صدر مملکت پارے کہ پاکستان ڈیہہ ٹی ہمیشہ امن وسلامتی ءِ مون آ درینے و پاکستان ءِ تینا زمواری تیان جوانی اٹ سماءِ۔
