اسلام آباد اٹی ہچ ءُ ماڑی اس غیر کانودی جوڑ جاڑ اف، اسلام آباد میٹروپولیٹن کارپوریشن نا دنگ اٹی داسہ دُن ءُ ماڑی جوڑ جاڑ کننگ نا پورو پابندی مریک، وزیر مملکت کیڈ ڈاکٹر طارق فضل چوہدری نا قومی اسمبلی ٹی ورندی

اسلام آباد۔ 09مارچ (اے پی پی) وزیر مملکت کیڈ ڈاکٹر طارق فضل چوہدری پارینے کہ اسلام آباد سٹی ٹی ہچ ءُ ماڑی اس غیر کانودی جوڑ جاڑ اف ولے خلقی علاقہ غاتیٹی دُن ءُ ماڑی ارے، وزیراعظم نا پارت آ اسہ وار ہلنگ آن پد اسلام آباد میٹروپولیٹن کارپوریشن نا دنگ اٹی داسہ دُن ءُ ماڑی جوڑ جاڑ کننگ نا پورو پابندی مریک۔ پنچ شنبے نا دے قومی اسمبلی ٹی وقفہ سوج آتیٹی زہرہ ودود فاطمی نا سوج انا ورندی ٹی ڈاکٹر طارق فضل چوہدری پارے کہ اسلام آباد نا علاقہ بنی گالہ ٹی سی ڈی اے نا این او سی آن بیدس کثیر المزلہ ماڑی جوڑ جاڑ کننگ انگ ءِ۔ غیر کانودی سرجز آتے توننگ کن سی ڈی اے نا کنڈآن قومی اخبار آتیٹی پبلک نوٹس شینک کننگ انگ ءِ۔ اوپارے کہ اسلام آباد جوڑ مننگ آن پد دا چرجوئی چلینگ انگ ءِ۔ اسلام آباد سٹی نا علاقہ ٹی باقاعدہ بائی لاز نا رداٹ ماڑی جوڑمریک۔ داڑے ہچ ءُ غیر کانودی ماڑی اس اف۔ آئی سی ٹی نا علاقہ ٹی بنی گالہ، بھارہ کہو قیام پاکستان آن مست انا آبادیک ءُ۔ داجاگہ نا نقشہ ءِ اسلام آباد نا یونین کونسل پاس کرسا کرے داسوب آن اوفے کھلی چھٹی ملا۔ داسہ اسلام آباد اٹی اولیکو وار میٹروپولیٹن کارپوریشن نا کنڈآن مچ آ علاقہ بسنے۔ وزیراعظم نا پارت آ اسلام آباد بلڈنگ کنٹرول اتھارٹی قائم کننگ ءِ ہرا بائی لاز جوڑ کیک۔ اوپارے کہ اسلام آباد نا دا آبادی تے اسہ وار ہلسا ولدا اوفتے ریگولز کننگے۔ اوپارے کہ غیر کانودی ہاؤسنگ سوسائٹی تیان بچنگ کن باقاعدہ خبر دار کننگک۔