اسلام آباد۔ 09مارچ (اے پی پی) بنجائی وزیر پارلیمانی امور شیخ آفتاب احمد پارینے کہ ایس ڈی جیز پروگرام نا رداٹ پنجاب و بلوچستان نا کنڈآن شراکت نا ورندی بسنے، داپروگرام نا رداٹ خلقی علاقہ غاتا خلقت ءِ بنداوی آسراتی تا فراوانی ءِ المی جوڑ کننگ انگ ءِ دااسہ کمیونٹی بیسڈ ءُ پروگرام اسے۔ پنچ شنبے نا دے قومی اسمبلی ٹی وقفہ سوج آتیٹی سراج محمد خان نا سوج انا ورندی ٹی شیخ آفتاب احمد پارے کہ ایس ڈی جیز پروگرام نا رداٹ خلقی علاقہ غاتیٹی خلقت ءِ بنداوی آسراتی تننگ انگ ءِ۔ دا کمیونٹی پروگرام کن 15خلقت تینا اسکیم ءِ راہی کیرہ تو داڑآ کاریم کننگک۔ نن غٹ صوبہ غاتے چھٹی اس نوشتہ کریسن کہ اخس کہ پیسہ بنجا دا پروگرام کن ایتک ہموخس بشخ صوبہ غاک ہم شاغر۔ پنجاب و بلوچستان آن ورندی بسنے۔ سندھ و کے پی کے آن ورندی نا انتظار ءِ۔ داپروگرام نا رداٹ بجلی، گیس و قدرتی وسیلہ، راجی بشخ ، میونسپل سیکٹر، بنداوی ڈھانچہ نا بشخ اٹی کاریم کننگک داڑآ عملدرآمد کمشنر کیک۔ ثریا جتوئی نا سوج انا ورندی ٹی شیخ آفتاب احمد پارے کہ ساڑی حکومت نا وخت اٹی قومی اسمبلی نا باسک آتے حلقہ وار ہچ ءُ فنڈ اس جاری کننگ تنے۔
