اسلام آباد۔ 07 مارچ (اے پی پی) دفاعی جاچکار و جہانی امور نا چاہندار لیفٹیننٹ جنرل (ر) رضامحمد خان پارینے کہ اوغانستان تینا گل زمین آ دہشت گرد آتے چٹفے یا اوفتے پاکستان نا حوالہ کے داٹی ہڑتوم آ ملک آتا بھلائی ئِ۔ ریڈیو پاکستان تون تدوک آدے مہمند ایجنسی ٹی سیکورٹی فورس آتا چیک پوسٹ آتیا جلہو نامذمت ئِ کرسا اوپارے کہ دا جلہو اٹی پاکستان نا نسبت اوغانستان ئِ زیات نسخان مسنے۔ اوپارے کہ پاکستان اٹی ای سی او و پی ایس ایل نا فائنل میچ انا سرسہب اڈتننگ آن پد دا وڑنا جلہو کننگانے و دانا رند اٹ بھارت نا دوئِ و او اوغان گل زمین ئِ کاریم اٹ اتسا شدت پسند آتے پیسہ تننگ ئِ۔ جنرل (ر) پارے کہ دُن انگا حالیت آتیٹی پاکستان بارڈر ئِ یلہ ہلنگ نا رسک ئِ ہلنگ کپک۔ اوغانستان ئِ دہشت گرد آتا سیم پار ہن و بر ئِ محدود کننگ کن پاکستان تون کمک کننگ نا گرج ئِ، بھارتی سروک آک تینٹ اعتراف کرینو کہ بھارت پاکستان اٹی دہشت گردی نا سرجزآتیٹی اوار ئِ و دامسخت کن اوغان گل زمین ئِ کاریم اٹ اتنگ ئِ۔ اوپارے کہ غٹ آن اہم ئُ ویل اسے کہ بھارت پاکستان ئِ نزور کننگ کن دہشت گرد آتے مالی و لاجسٹک کمک فراوان کننگ ئِ ولے دامسخت آتیٹی او وخت اس ہم سرسہب مفک۔
