پاکستان شونداری و شونہالی نا کنڈآ ہِننگ ئِ ، 2013ءٹی ہراتم حکومت ئِ سنبھالان تو ملک ئِ بھلا چیلنج آک مون تروک ئسر ، اینو الحمداللہ حالیت آک بھاز جوان ئُ
کویت سٹی۔ 06مارچ (اے پی پی) وزیراعظم محمد نواز شریف پارینے کہ 2013ءٹی ہراتم حکومت ئِ سنبھالان تو ملک ئِ بھلا چیلنج آک مون تروک ئسر، اینو الحمداللہ حالیت آک بھاز جوان ئُ، 90 ءنا دہائی نا ڈٹ آک برجاسلیسرہ تو پاکستان ایشین ٹائیگر جوڑ مسکہ، توانائی ناتنکی ئِ ہڑدڑی بنداو تیا ایسر کننگ اُن، کویت اٹی پاکستانی تا ویل آتیا امیر کویت تون ہیت وگپ کیوہ۔ دوشنبے نا دے داڑے پاکستانی کمیونٹی آن تران کرسا وزیراعظم پارے کہ پاکستان شونداری و شونہالی نا کنڈآ ہِننگ ئِ ، ہراتم نن اقتدار ئِ سنبھالان تو بجلی، دہشت گردی ، معیشت کون آ چیلنج آک مون تروک ئسر۔ اوپارے کہ ای 26سال مست کویت آ بسوسٹ، نن پبی وڑاٹ کویت تون تفین، اللہ ننا فیصلہ ئِ سرسہب کرے ، کویت آجو مس۔ اوپارے کہ ای ایماندار کویتی امیر تون ملنگ کن طائف آ ہناٹ ہراک نئے بیرہ پاکستان ئِ ہروڑنا کمک تننگ نا درشانی ئِ کریر بلکن کمک تسر، ولی عہد تون ہم بھاز جوان ئُ تعلق اس ئس۔ اوپارے کہ کویت پاکستان نا اسہ جوان ئُ سنگت اس جوڑ مس، اگہ دا چرجوئی برجاسلیسکہ تو سنگتی پین سوگو مسکہ و ہچ ئُ ویل اس متوکہ۔ اوپارے کہ جنگ آن پد پاکستان و کویت نا نیام اٹ گچین تعلقداری مس، 1991ءٹی شونداری نا رفتار برقرارمسکہ تو اینو پاکستان ایشیائی ٹائیگر جوڑ مسکہ۔ اوپارے کہ 1991ءآن 1993ءنا دونیم سال انا مد اٹی نن پاکستان ئِ شونداری نا اسہ پوسکن ئُ کسر آ نشان تسن۔ وزیراعظم پارے کہ نن تینا اولیکو دور اٹی بھلو ڈٹ بناءکرین، اسلام آباد۔ لاہور و اسلام آباد۔پشاور موٹروے ڈٹ آتا بنائِ کرین، معیشت ئِ آجوجوڑ کرین۔ وزیراعظم پارے کہ تینا مون نا دور اٹی نن ولدا شونداری ناسفر نا بنائِ کرین، مچ آ ملک اٹی موٹرویز، شاہرات ، ڈیم و توانائی نا ڈٹ جوڑ کرین۔ چائنہ۔ پاکستان اکنامک کوریڈور ڈٹ ڈیہہ نا ملک آتے کن اسہ گیم چینجر اس مریک۔ اوپارے کہ مہالو پاکستان اٹی 16گھنٹہ آن زیات لوڈشیڈنگ مسکہ، نن بجلی نا تنکی ئِ چٹفنگ کن ڈٹ جوڑ کرین، بھاشا و داسو ڈیم اتون اوار و ایلو توانائی نا ڈٹ آتیا کاریم نا بناءمس، بھاشا ڈیم ، تربیلا و منگلاڈیم آن ہم بھلو پروجیکٹ ئُ ، ہراڑآن 4500 میگاواٹ بجلی ودی مریک۔ ہنداوڑ داسو ڈیم آن ہم 4500 میگاواٹ بجلی ودی مریک۔ وزیراعظم پارے کہ گدرینگوک آ منہ سال اٹی سسٹم اٹی 16ہزار میگاواٹ بجلی داخل مس و داٹی بروک آ سال تیٹی پین ودکی مریک۔ اوپارے کہ نن ہڑزان بجلی ودی کننگ نا ڈٹ خلنگ اُن، تھر انا کولانا پروجیکٹ آ کاریم نا بنامسنے، 2018ءآن پاکستان اٹی ہڑزان بجلی فراوان کننگک۔ اوپارےکہ کنا مشن بجلی نا لوڈشیڈنگ ئِ چٹفنگ، بجلی نا خڑچ اٹی کمتی اتنگ نا ئِ تانکہ کشار گر ، صنعت کار و اُرائی صارف آتے فائدہ مرے۔ اوپارے کہ 2018ءٹی 10 ہزار میگاواٹ بجلی نیٹ ورک اٹی اوار مریک وخت اس کہ بروک آ منہ سال اٹی پین 30 ہزار میگاواٹ بجلی سسٹم اٹی اوار مریک۔ اوپارے کہ توانائی تنکیئِ ہڑدڑی بنداو تیا ایسر کننگ اُن، سی پیک اٹی 50 ارب ڈالر نا ڈٹ آتیا کاریم نا بنامسنے، پاکستان نا کونہ کونہ ٹی ہائی ویز، روڈ، موٹروے جوڑ مننگ ئِ۔ اوپارے کہ اولیکو وار بلوچستان نا الس نا احساس محروم چٹنگ ئِ، بلوچستان اٹی شاہرات آتا ڈٹ آک برجائُ۔ گوادر آن کوئٹہ کن گچین ئُ شاہراہ جوڑ کننگانے، داسہ منہ گھنٹہ ٹی دا سفر مننگ کیک، مہالو گوادر آن کوئٹہ اسکان سفر اٹی اِرا دے لگاکہ۔ اوپارے کہ سی پیک ڈٹ اٹی میر پور آن مظفرآباد و دریائے جہلم تون ایکسپریس وے جوڑ مریک، مظفرآباد آن مانسہرہ و خنجراب کن شاہراہ جوڑ جاڑ مریک۔ اوپارے کہ مانسہرہ ، ایبٹ آباد، حویلیاں و حسن ابدال کن موٹروے جوڑ جاڑ مریک ہراڑآن نئے بیرہ پاکستان ئِ فائدہ مریک بلکن نیامی ایشیائی ریاست آک تینا گڑاتے برآمد کننگ کیرہ۔ اوپارے کہ نن ریلوے نا اپ گریڈیشن ئِ کننگ اُن، کراچی آن پشاور اسکان ریلوے سسٹم اٹی گچینی اتنگ انگ ئِ ۔ وزیراعظم پارے کہ ساڑی ہی ٹی پاکستان اٹی ای سی او نا سروک دیوان مس ہراٹی باسک ملک آتا راہشونک امنا کریر کہ پاکستان تون رابطہ غاتیٹی ودکی کننگک۔ اوپارے کہ 2014ءٹی دہشت گردی نا برخلاف آپریشن نا بنائِ کرین، دہشت گرد آتا مخ انا ملی ئِ پرغنگانے۔ دہشت گردی ناسور اس جوڑ مسوسس، دہشت گردی نا چٹفنگ کن جان تے ندر کرین۔ اوپارے کہ داسہ ہم وڑانا وڑاسے ٹی دہشت گردی کاٹم ہرفنگ نا کوشست کیک ہرادے لتاڑنگک۔ وزیراعظم پارے کہ ننا فوج ، پولیس ، انتظامیہ و کودک الس بھلو قربانی تسنے، نن دہشت گردی نا چٹفنگ نا کنڈآ ہِننگ اُن۔ وزیراعظم پارے کہ نن شونداری کن خودانحصاری آ یخین تخنہ۔ اوپارے کہ مچ آملک اٹی موٹروے نا ڈٹ آتیا کاریم برجائِ ، لاہور آن ملتان شش لین موٹروے ڈٹ زوت پورو مریک، ہنداوڑ ملتان آن سکھر موٹروے نا جوڑ جاڑ مننگ ئِ، کراچی آن حیدرآباد موٹروے نا جوڑ جاڑ برجائِ ، بروک آ منہ تو اٹی سکھر و حیدر آباد موٹروے نا جوڑ جاڑ بناءکیک۔ اوپارے کہ زوت کراچی آن پشاور اسکان شش لین موٹروے جوڑ جاڑمریک۔ وزیراعظم پارے کہ بروک آ گچین کاری تے دے کٹک و دے باایتک دا اللہ ئِ سمائِ ، نن پاکستان ئِ شونداری نا کسر آک ہُننگ خوانہ۔ اوکویت نا شونداری ٹی پاکستانی تا کڑدانا ستائِ کرے و پارے کہ کویت اٹی مون تروک پاکستانی تا ویل آتیا امیر کویت تون ہیت کیوہ۔ وزیراعظم پارے کہ کنا خواہش ئِ کہ ہراتم پیشن نا ملک رہینگوک پاکستانیک ملک آ پدی بریر تو او ملک انا شونداری و شونہالی نا تغ انا تعبیر ئِ تینٹ خنر و نن ہم اوفتا آزموندہ غان فائدہ ہرفن۔
