کوئٹہ۔ 06مارچ (اے پی پی) یونیورسٹی آف تربت ننا اولیکو کانووکیشن چارشنبے نا دے 8مارچ 2017ءآ ایم ایٹ روڈ گھنہ ٹی واقع یونیورسٹی نا پوسکن آ ماڑی ٹی اڈ ہلیک۔ داچرجوئی ٹی غٹ تیاری و بست و بند آتے پورو کننگانے۔ گورنر بلوچستان و چانسلر تربت یونیورسٹی محمد خان اچکزئی مہمان خاص نا حیثیت اٹ کانووکیشن اٹی ساڑی مریک و سال 2015ءو سال 2016ءٹی فارغ مروک آدوسد آن زیات طالب علم آتیٹی گولڈ میڈل و سند بشخ و پانٹ کیک۔ مسکوہی وزیراعلیٰ بلوچستان ڈاکٹر عبدالمالک بلوچ کانووکیشن نا اعزازی مہمان مریک۔ کانووکیشن اٹی قومی و صوبائی اسمبلی و سینیٹ نا ساڑی و مسکوہی باسک، چندی یونیورسٹی تا وائس چانسلر ، تربت یونیورسٹی نا سینیٹ باسک و ایلو آئینی باڈیز آتا باسک، لوکل انتظامیہ نا افسر، سیاسی و راجی راہشون ، علاقائی شرفمند و سرکڑدہ ، سول سوسائٹی و میڈیا نا نمائندہ ، تعلیم نا چاہندار ، تربت یونیورسٹی نا فیکلٹی باسک و انتظامی افسر آتیان بیدس طالب علم آک بھلو کچ اسے ٹی ساڑی مریرہ۔ گورنر بلوچستان محمد خان اچکزئی یونیورسٹی نا پوسکن آ جوڑ جاڑ مروک ماڑی نا دورہ ئِ ہم کیک داوخت آ او شعبہ کیمسٹری نالیبارٹری و ویڈیو کانفرنس ہال نا بنائِ کننگ آن بیدس بس و ویگن نا چابی تے وائس چانسلر نا حوالہ کیک ہرا اونا خصوصی فنڈ آن ہلنگانو۔ کانووکیشن فل ڈریس ریہر سل اینو 7 مارچ آ یونیورسٹی نا پوسکن آ ماڑی ٹی اڈ ہلنگ ئِ۔
