اسلام آباد۔ 06 اکتوبر (اے پی پی) وزیر خارجہ مخدوم شاہ محمود قریشی پارینے کہ کنزرویٹو فرینڈز آف پاکستان، پاکستان، برطانیہ، کنزرویٹوپارٹی و برطانیہ ٹی رہینگوک پاکستانی کمیونٹی نا نیام اٹ بھلن، سوگو تعلقداری تا جوڑ کننگ کن کوشست کننگ ءُ۔ بھارت تینا انتہاپسندی و اسہ کنڈی، غیر آئینی گام گیج آتا سوب مچ آ ڈیہہ نا امن و ایمنی ءِ بھاز خطرہ غاتیان دوچارکرینے۔ داہیت آتے او کنزرویٹو فرینڈز آف پاکستان نا ورچوئل دیوان آن تران کرسا پارے۔ وزیر خارجہ کنزرویٹو فرینڈز آف پاکستان نا ورچوئل دیوان اٹی بطور مہمان خاص بشخ ہلک۔ وزیر خارجہ پارے کہ کنزر ویٹو فرینڈز آف پاکستان، لارڈ ضمیر چوہدری نا کماشی ٹی پاکستان، برطانیہ، کنزرویٹو پارٹی و برطانیہ ٹی رہینگوک آ پاکستانی کمیونٹی نا نیام اٹ گیشتر، سوگو تعلقداری تا جوڑ کننگ کن کوشست کننگ ءُ۔ برطانیہ ٹی لکھ آ پاکستانی نژاد برطانوی شاری تا ساڑی گری، پاکستان و برطانیہ نا نیام اٹ ہڑتوم آ کنڈآتا تعلقداری تا سوگوی نا درشانی ءِ۔ اوپارے کہ پدتموک ملک آتیکن کورونا دین انا زرگزرانی زہم تتون مون تننگ بے کچ مشکل ءُ ہیت اسے۔ پاکستان، کچ اٹنگا زرگزرانی وسیلہ غاتیان پد ہم، سمارٹ لاک ڈاؤن نا پالیسی ءِ تینا کرسا، کورونا دین انا تالانی ءِ بھلو حد اسسکان کم کننگ اٹ سرسہب مس۔ پاکستان زموارانہ زرگزرانی پالیسی تے تینا کرسا تینا زرگزران ءِ گچینی نا کنڈآ درے۔ دا پالیسی تیٹی پیشن نا زرکاری نا کچ اٹی ودکی، برآمد آتا مون آ دننگ، انفارمیشن ٹیکنالوجی نا کثرت اٹ کاریم اٹ اتنگ و سیل و سوات نا مون آ دننگ اوار ءِ۔ وزیر خارجہ دیوان اٹی بشخ ہلوک آتے مقبوضہ جموں و کشمیر اٹ بھارتی کوزہ گر فوج انا کنڈآن جاری انسانی حق انا سنگین خلاف ورزی تیان معلومدار کرے و پارے کہ بھارت تینا انتہاپسندی و اسہ کنڈی، غیر آئینی گام گیج آتا سوب مچ آ ڈیہہ نا امن و ایمنی ءِ خطرہ غاتیان دوچار کرینے۔بھارت جہانی کانود آتے اسہ کنڈ تخسا، مقبوضہ جموں و کشمیر نا آبادیاتی تناسب ءِ بدل کننگ اٹ لگوک ءِ۔ پاکستان نا خواست دادے کہ مقبوضہ کشمیر اٹی انسانی حق انا خلاف ورزی تے دمدستی توننگ و اقوام متحدہ سیکورٹی کونسل نا قرارداد آتے مون آ تخسا کشمیر ناویل انا پرامن ایسری کن بھارت آ زور شاغنگے۔ دیوان اٹی برطانوی، حکومتی وزیر آک، برطانوی پارلیمنٹ نا باسک آک و پاکستانی کمیونٹی نا بھاز انگا پنی آ شخصیت آک بشخ ہلکر۔
