اسلام آباد۔ 02 اکتوبر (اے پی پی) اسٹیٹ بینک آف پاکستان (ایس بی پی) ملک اٹ ہسپتال تا تفنگ کن رعایتی کچ وام تا فراوانی ءِ اِراہنداخہ کننگ نا فیصلہ ءِ کرینے۔ مرکزی بینک ہسپتال نا تفنگ کن آسان شڑت آتیا وام انا حد ءِ 500 ملین آن اسہ ارب روپئی اسکان ودفینے۔ ایس بی پی نا رداٹ پوسکن آ ہسپتال آتا تفنگ کن وام تا فراوانی نا اسکیم 30 جون 2021ء اسکان برجاسلک۔ اسٹیٹ بینک آف پاکستان کوویڈ۔ 19 نا دین انا سوب ملک اٹ جان جوڑی نا آسراتی تا گچینی و ودکی کن آسان شڑت آتیا وام فراوان کننگ نا فیصلہ کریسس و صوبائی یا بنجائی محکمہ جان جوڑی تون رجسٹرڈ ہسپتال 3 درسد شرح سود آ وام ہلنگ کیک۔ بناٹی اسکیم کن 5 ارب روپئی جتا کننگاسس و اسہ ہسپتال 200 ملین روپئی اسکان وام ہلنگ کریکہ۔ اوکان پد وام انا حد ءِ 500 ملین روپئی اسکان ودفنگا ہرادے داسہ اسہ ارب روپئی اسکان ودفنگانے۔
