واشنگٹن۔ 02 اکتوبر (اے پی پی) امریکی صدر ڈونلڈ ٹرمپ و اونا اُرائی میلانیا ٹرمپ انا کورونا دین انا زہمی مننگ پک مسنے، اوکان پد صدر و خاتون اول ہڑتوم آک تینے قرنطینہ کرینو۔ صدر ڈونلڈ ٹرمپ تینا ٹویٹ اٹی داہیت ءِ پک کرینے کہ اونا و اونا اُرائی میلانیا کوویڈ۔ 19 نا ٹیسٹ مثبت بسنے۔ داکان مست انا سلاہکار و خڑک انا سنگت ہوپ ، مکس اٹ کورونا دین انا تشخیص آن پد صدر و اونا اُرائی میلانیا نا ہم کورونا ٹیسٹ مسوسس۔ ہوپ ہکس سے شنبے نادے آ ریاست اوہائیو ٹی اڈ ہلوک آ شرہ ٹی بشخ ہلوک آ ہموکارندہ غاتیٹی ئس ہرا صدر ٹرمپ اتون اونا جہاز ایئر فورس ون آ ساڑی ئسر۔ داکان پد چارشنبے نادے آ وائٹ ہاؤس نا نمائندہ غاتا رداٹ او صدر ٹرمپ اتون اونا ہیلی کیپٹر میرین ون اٹ ہم سُوار مسوسس۔ 31 سال انا ہوپ ہکس صدر نا ٹیم اٹ کورونا دین آن زہمی مروک آ غٹ آن خڑکی کارندہ ءِ۔ ہوپ ہکس اٹ کورونا نا تشخیص مننگ آن پد تینا تازہ ٹویٹ اٹ صدر ٹرمپ پارے کہ اوو اونا اُرائی ہم تینا کورونا ٹیسٹ انا نتیجہ نا چاری ءُ و اوفک تینے قرنطینہ کننگ نا عمل نا بناءِ کرینو۔ فاکس نیوز ءِ انٹرویو ٹی صدر ٹرمپ پارے کہ او و خاتون اول ہوپ ہکس اتون بھلو وخت اس گدریفینو۔ ہوپ ہکس صدر تون اوار ریاست منی سوٹا ٹی اڈ ہلوک آ اسہ ریلی اسے ٹی ہم بشخ ہلکر۔ وائٹ ہاؤس ہمو غٹ کارندہ و سلاہکار تا کورونا ٹیسٹ ءِ کیک ہرا ہڑدے نا بنداو آ صدر ٹرمپ اتون رابطہ ٹی بریرہ۔ ٹرمپ ءِ ماسک بیننگ وڑتفک و سرکاری دود آتیٹی ہلوک آ زیات تر عکس آتیٹی اودے ماسک و راجی مُری اختیار کننگ آن بیدس تینا ٹیم انا کارندہ یا ایلو بندغ آتون ملنگ آ ہُننگ مریک۔ بلومبرگ نیوز انا رداٹ منی سوٹاغان پدی بننگ آ ہوپ ہکس کورونا نا نشانی پاش مننگ بناکریسس و اودے ہمووخت آ جہاز اٹ قرنطینہ تخنگاسس۔ ہوپ ہکس مستین اٹ ٹرمپ انا صدارتی مہم نا ترجمان نا وڑاٹ کاریم کرے و اونا عہدہ ءِ سنبھالنگ آن پد او اونا کمیونیکیشنز ڈائریکٹر جوڑ مس۔ دُن تو مارچ 2018 ء ٹی اواستیفہ ترسا فاکس نیوز اٹ ملازمت اختیار کریسس ولے ہندا سال فروری ٹی او وائٹ ہاؤس آ پدی بس۔ داکان مست وائٹ ہاؤس نا چندی کارندہ غاتیٹی وائرس پک مسنے۔
