لمہ وطن نا رکھ اکن جان تے ندر کروک آک ننا اصل ہیروک ئُ، قوم دہشت گرد آتا ناپاک عزم انا برخلاف سیسہ پلائی مروک دیوال اس جوڑ مرسا اوفتے خراج عقیدت پیش کننگ نا عہد کیک، وزیراعظم محمد نواز شریف

اسلام آباد۔ 06مارچ (اے پی پی) وزیراعظم محمد نواز شریف ملکی دفاع کن جان تے ندر کروک آ پاک فوج انا ورناتے خراج عقیدت پیش کرسا پارے کہ او قوم انا اصل ہیروک ئُ۔ دوشنبے نا دے جاری اسہ بیان اسے نا رداٹ وزیراعظم مہمند ایجنسی ٹی سیم پار آن دہشت گرد جلہو اٹی شہید مروک آ پاک فوج انا 5ورناتا شہیدی آ اوفتے خراج عقیدت پیش کرسا اوپارے کہ لمہ وطن نا رکھ اکن جان تے ندر کروک آک اصل ہیروک ئُ و قوم دہشت گردآتا ناپاک عزم انا برخلاف سیسہ پلائی مروک دیوال اس جوڑ مرسا اوفتے خراج عقیدت پیش کننگ نا عہد کیک۔ وزیراعظم ورناتا شہیدی آ ڈکھ و است ہسونی نا درشانی ئِ کرسا پارے کہ پاکستان سیم تیا و شار تیٹی تینا مستعد ورناتا سوب سوگو آن سوگو تر مریک اوپارے کہ دہشت گرد آک اگہ داسمجھیرہ کہ او ننا قوم انا عزم ئِ نزور کننگ کیرہ تو اواوفتا غلطی ئِ۔ اوپارے کہ آپریشن ردالفساد ہر دہشت گرد انا برخلاف ئِ ہرا ملک انا تہٹی ساڑی ئِ یا پیشن نا علاقہ غاتیان کاریم کننگ ئُ۔ اوپارے کہ پاکستان نا دشمن تینا کینسر زدہ نظریہ اتون نیست و نابود مریرہ۔ وزیراعظم دہشت گرد جلہوا ٹی شہید مروک آ ورناتا درجہ غاتا بڑزی و اوفتا خاہوت کن صبر و جمیل نا دعا کرے۔