پشاور۔ 28 ستمبر (اے پی پی) وزیراعظم عمران خان پارینے کہ صوبہ غاتا کنڈآن این ایف سی ایوارڈ آن مسہ درسد بشخ قبائلی ضلع غاتیکن جتا کننگ نا وعدہ کننگاسس ولے داسہ بدبختی اٹ دا وعدہ آن انحراف کننگ انگ ءِ، ہرا قبائلی ضلع غاتون بیدادی اسے۔ ضلع مہمند اٹ ناحقئی سرنگ و شیخ زید روڈ انا بناءِ کننگ نا وخت آ ضلع نا سرکڑدہ غاتیان تران کرسا وزیراعظم پارے کہ ننا حکومت نانظریہ ریاست مدینہ ءِ،چوری، نیزگار، جنوزان و غریب آتا گچینی ریاست مدینہ نا وڑانا ریاست نا اولی زمواری مریک ہنداخاطرآن دا زمواری ناپوروی کن غٹ دوئی وسیلہ غاتے کاریم اٹ اتنگ ءِ اولیت تننگ انگ ءِ۔ اوپارے کہ ننا غٹ پالیسی تا وت نزور تپہ غاتا بحالی ءِ ولے داڑتون اوار اوار ننا نظریہ نا اسہ ٹک اس داہم ارے کہ شونہالی نا سفر اٹ غٹ علاقہ غاتے اسہ وڑ شون تننگے۔ اوپرے کہ غٹ چارہ کہ اِراسال آن حالیت آک خراب ءُ، سہی مننگ والا ئسر ولدا کورونا بس، داسوب آن پیسہ کم یکجامس۔ کوشست کیوہ کہ کم از کم اوار مروک علاقہ و بلوچستان ءِ ہرافنڈزدرکار ءِ او ملر و اوفتیٹی تعطل ودی مف۔ اوپارے کہ ملک دشمن قوت آک جتا وڑاٹ بے چیٹی ودی کننگ نا کوشست کیرہ تانکہ پاکستان خاص کر قبائلی علاقہ غاتا شونداری نا عمل ءِ توننگ مرے و نن قبائلی باتی تا کمک اٹ دا چم آتے بے سہب کروئی ءِ۔ اوپارے کہ گڑتی ءِ ننا دشمن ہمو مخلوق تون پورو وڑاٹ رابطہ ٹی ءِ ہرا خواپسہ کہ قبائلی علاقہ غاک اوار مریر، او پورو کوشست کیرہ کہ وڑاناوڑاسے ٹی بے چیٹی تالان کننگے۔ وزیراعظم پارے کہ ملک آن پیشن دشمن داوڑنازموار آتے فنڈنگ کیرہ ، و وار وار انضمام اٹ اڑاندشاغنگ نا کوشست کیرہ۔
