اقوام متحدہ۔ 28 ستمبر (اے پی پی) اقوام متحدہ نا سیکرٹری جنرل انتونیوگوٹریش یمن اٹ خانہ جنگی نا چٹفنگ کن حکومت و حوثی باغی تا نیام اٹ بندی تا ہڷ و تس نا معاہدہ ءِ ستاکڑزوک گوندانے۔ میڈیا نا رداٹ اقوام متحدہ نا سروک نا ترجمان سٹیفن دوجارک پارے کہ سیکرٹری جنرل انتونیوگوٹریش ہڑتوم آ کڑدہ غاتیا زور شاغانے کہ او یمن جھیڑہ تون گنڈوک دزگیر کروک غٹ بندغ آتا یلہ کننگ کن حتمی گام گیج کیر و دا چرجوئی ٹی یمن حکومت و حوثی باغی تا نیام اٹ 2018 ء ٹی سویڈن اٹ بندی تا یلہ کننگ نا معاہدہ غا عملدرآمد ءِ پک کننگ کن انٹرنیشنل کمیٹی ریڈکراس و اقوام متحدہ نا چاروکی ٹی کمتی نا کوشست آک سفت نا قابل ءُ داخا آخا او سوئٹزر لینڈ حکومت نا مہمانداری آ منت واری ءِ ہرفک۔ اوپارے کہ سیکرٹری جنرل کڑدہ غاتیان خواست کرینے کہ او جنگ بندی،اقتصادی و انسانی ہمدردی نا گام گیج و جنگ انا چٹفنگ کن اسہ جوان ءُ سیاسی عمل اسے دُوارہ بناءِ کننگ آ اقوام متحدہ ٹی تینا خصوصی ایلچی اتون اسیجائی اعلامیہ غا امنائی سلاہ کیر۔ یات سلے کہ تدوک آ دے اقوام متحدہ نا چاروکی ٹی یمن حکومت و حوثی تا نیام اٹ 1081 بندی تا ہڷ و تس انا معاہدہ پک مس۔ معاہدہ نا رداٹ یمن حکومت بند کروک 681 حوثی و حوثی باغی 400 حکومتی بندغ آتے یلہ کیرہ۔
