واشنگٹن۔ 23 ستمبر (اے پی پی) امریکہ ٹی کورونا نا دین آن مرک آک اِرا لکھ آن گدرینگانو۔ امریکہ نا جان ہاپکنز یونیورسٹی نا رداٹ داتم اسکان امریکہ ٹی 68 لکھ بندغ دا دین آن زہمی مسنو ہرا مچ آ دنیا ٹی اسہ ملک اسے ٹی دا دین آن زہمی مروک آتا غٹ آن زیات کچ ءِ۔ کورونا دین آن زہمی مروک آتا کچ اٹ دا ودکی قطبی ڈکوٹا و یوٹا ٹی کیس آتیٹی ودکی آن پد مس۔ برطانوی نشریاتی ادارہ نا رپورٹ نا رداٹ داکان مست ملک اٹ دا دین انا بناٹی صدر ڈونلڈ ٹرمپ پاریسس کہ اگہ دین آن مرک آک اسہ لکھ آن اِرا لکھ انا نیام اٹ مریر دانا مطلب ءِ کہ ملک جوان ءُ کارکڑد اس نشان تسنے۔ جان ہاپکنز یونیورسٹی سے شنبے نادے آ ہرا حساب وکتاب ءِ جاری کرے اونا رداٹ مرک آک اِرالکھ پنچ مسنے۔ جان ہاپکنز یونیورسٹی تدوک آ سال چین آن دا دین انا بناآن پد آن دا حساب وکتاب نا ریکارڈ مرتب کننگ ءِ۔ امریکہ ٹی کورونا دین انا اولیکو کیس جنوری ٹی رپورٹ مس۔ حزب اختلاف نا صدارتی اومیتدار ڈیموکریٹ راہشون جوبائیڈن پارینے کہ تدوک آ شش تُو اٹی صدر ڈونلڈ ٹرمپ نا نابودی نا سوب آن نن امریکہ نا تاریخ اٹ غٹ آن زیات جانی نسخان برداشت کرینن۔ اوپارے کہ صدر ڈونلڈ ٹرمپ کورونا نا دین انا تنکی ٹی گچین ردعمل نشان تننگ اٹ بے سہب مس۔ ہرانا قیمت ءِ امریکہ دا دین آن دنیا ٹی غٹ آن زیات جانی و مالی نسخان نا حالیت اٹ اداکرے۔ امریکی کمامدارآتارداٹ قطبی ڈکوٹا ٹی کورونا دین انا کیس آتیٹی ترندی اٹ ودکی خننگا۔ داکان بیدس یوٹا، وسکونسن، ٹیکساس و سویلی ڈکوٹا نا ریاست آتیٹی ہم کورونا دین انا کیس آتیٹی ودکی مننگ ءِ۔ داحالیت آتیٹی گڑتی ظاہر کننگ انگ ءِ کہ یخ انا موسم اٹی کورونا دین آن انفیکشن آتا کچ اٹی ودکی مریک۔ امریکہ ٹی دینی مرض آتا چاہنداراینتھونی فوسی دا تُو انا اول اٹ خبڑدار کریسس کہ امریکی شاری تے خزاں ویخ اکن تیار تخنگے۔
