کوئٹہ۔ 23 ستمبر (اے پی پی) وزیراعلیٰ بلوچستان جام کمال خان پشتون کلچر ڈے انا بابت کلہو اٹی پارینے کہ بلوچستان چندی قوم، قبیلہ و رنگ و نسل آن تعلق تخوک آتا گلدستہ ءِ، صوبہ نا یکتا دودوربیدہ، روایت و تہذیب و تمدن داڑے رہینگوک آ مخلوق نا پہچان ءِ، زندہ و باشعور قومک تینا دودوربیدہ ئی و روایتی قدر و تاریخی میرات آتا رکھ ءِ کیرہ، اوپارے کہ زبان تا قومی دے ءِ اڈتننگ نا مسخت ہمو غٹ روایت، دودوربیدہ، یکتا زند انا وڑ تے پہہ مننگ و اودے مدام زندہ تخنگ نا کوشست ءِ۔ صوبہ نا ادبی تاریخ اٹ پشتون شاعر، ادیب، مورخین و مصنف آک صوبہ نا تہذیبی، دودوربیدہ ئی و روایتی ترجمانی ءِ جوان وڑاٹ کرینو۔ پشتون ادب نا تاریخی اعتبار اٹ نمان پن و روشنا استار تیٹی خوشحال خان خٹک، رحمان بابا، حمزہ شنواری، عبدالعلی اخوانذادہ، پیر محمد کاکڑ، عابد شاہ عابد فاروق سرور، عمر گل عسکر اوار ءُ، وزیراعلیٰ بلوچستان جام کمال خان پارے کہ غٹ شاعر آک و ادیب آک تینا کلام اٹ مدام پشتون قوم ءِ ملی یگانگت، ہم آہنگی، قومی یکجہتی، بہادری، سیوت و سخا وہروڑنا تعصب آن ایڑتر مثبت و تعمیری سوچ انا رغامانو۔ اینو نا ورناتے دا غٹ تعمیری پلو آتے مون آ تخسا ملک و صوبہ نا شونداری و شونہالی ٹی فعال کڑد ادا کننگ نا گرج ءِ۔ اوپارے کہ راج و صوبہ نا گچین عکاسی و ترجمانی المی ءِ، پشتون کلچر ءِ روایتی علاقائی رقص اتن و بیرشت نا وڑ یکتا کیک۔ پشتون تا پکوان و اوفتا مہمانداری ءِ تاریخ اٹ مدام روشنا لوز آتیٹی یات تخنگانے، اومستی پارے کہ پشتون مصنف آک تینا کتاب آتیٹی رواداری، سگ، تحمل مزاضی، میانہ روی آ عمل کرسا اجتماعیت ءِ مون آ دننگ نا رغامانو، اینو نادے ننے ہمو غٹ مثبت اصول آتا پورو وڑاٹ عمل کننگ نا رغامک۔ اینو نادے تخریبی سوچ انا نفی کرسا اسہ تعمیری راج اسے نا ٹہیفنگ نا کنڈآ چکک۔
