بیجنگ۔ 22 ستمبر (اے پی پی) اقوام متحدہ نا جوڑ مننگ نا 75 می سال دے انا وخت آ مروک آ سرکڑدہ ئی دیوان اٹ چین نا صدر شی جن پنگ اسہ اہم ءُ تقریر اس کرے۔ تینا تران اٹی شی جن پنگ داہیت آ زور شاغا کہ اقوام متحدہ نا انصافی تا چٹفنگ، کانود نا حکمرانی ءِ نافذ کننگ، کمکاری ءِ مون آ دننگ و دین آن پد انا دور اٹی گام گیج آتیا چکار کے۔ اوداہیت انا درشانی ءِ ہم کرے کہ چین مدام کثیر الجہتی نا عملی درشانی ءِ کروک آ ملک ءِ، چین جہانی نظم و نسق انا نظام نا اصلاح و تعمیر اٹ فعال وڑاٹ بشخ ہلیک و بنی نوع انسان نا مساوی راج انا تعمیر ءِ مون آ دیک۔ شی جن پنگ پیدوارکرے کہ 75 سال مست دنیا نا الس خونی جنگ آتیان گدرینگا و دنیا سیوت نا کمک اٹ فاشٹ واکدار تا برخلاف عظیم ءُ فتح اس دوئی کرے۔ داانصاف نا فتح و الس نا فتح ءِ۔ اوپارے کہ دا ادارہ 75 سال انا بھلو دور اسے آن گدرینگانے۔ داسہ دنیا ٹی امن و شونداری نا اسہ پوسکن ءُ بشخ اس ملنگانے۔
