اسلام آباد ۔ 11 ستمبر (اے پی پی) مزن وزیر ءِ ھاسیں کمکار ڈاکٹر ثانیہ نشتر دو روچی تر ءُ تاب ءِ ھاترا راجن پور ءُ ملتان ءَ روت۔ ثانیہ نشتر راجن پور ءَ استیں احساس نشوونما سنٹر ءِ تر ءُ تاب ءَ کنت انت۔ احساس نشوونما ملکی راجدپتر ءَ سٹنٹنگ ءِ گر ءُ دار ءِ اولی حکومتی پروگرام انت۔ سٹنٹنگ ءِ نادراھی ءِ کساس ءَ چہ پاکستان پڑے دومی نمبر ءَ انت۔ گوستیں وھد ءَ حکومت ءَ اے جیڈھ ءِ سر ءَ دلگوشی نہ داتگ۔ پاکستان ءَ زھگ آنی سٹنٹنگ ءِ جیڈھ مدام ءَ چہ مزن وزیر عمران خان ءِ اول سرئی کار آںی تہ ءَ ھوار بوتگ۔ مزن وزیر عمران خان ءَ 13 اگست 2020 ءَ خیبر پختونخوا ءِ قبائلی ضلع خیبر ءَ استیں نشوونما بنجاھ ءَ اے پروگرام ءِ یک شلی ءَ بنگیج کتگ بوتگ۔ دو سال ئَ چہ کم امبر ءِ زھگ، نیپگانی زالبول ، شیر میچینوکیں مات آںی وردن ءُ وراک ءِ سبب ءَ سٹنٹنگ ءِ گر ءُ داسر ءِ واستہ احساس نشوونما پروگرام بندات کنگ بوتگ۔ اولی بھر ءَ نشوونما پروگرام ءِ چیر دستی ءَ سرجمیں ملک ءَ 9 ضلع آنی تہ ءَ 33 نشوونما بنجاھ جوڑ کنگ بوھگ ءَ انت۔ اولی بھر ءَ 9 ضلع آنی تہ ءَ خیبر، اپر دیر، باغ، غذر، ہنزہ، خارمنگ، خاران، بدین ءُ راجن پور ھوار انت۔ ھاسیں کمکار ڈاکٹر ثانیہ نشتر باندات جام پور ءَ احساس سروے بنجاھ ءِ تر ءُ تاب ءَ ھم کنت۔ احساس این یس ای آر ءِ چیر دستی ءَ توامیں ملک ءَ سروے ءِ کار جاڑی انت۔ اے دو روچی تر ءُ تاب ءِ ساھت ءَ ثانیہ نشتر ملتان ءَ جوڑیشت بوھوکیں لنگر خانہ ءُ احساس کفالت بنجاھ ءِ تر ءُ تاب ءَ ھم کنت۔ پبلک پرائیویٹ پارٹنرشپ ءِ چیر دستی ءَ توامیں ملک ءَ احساس لنگر خانہ آنی جوڑیشت ءِ کار جاڑی انت۔
