مزدور طبقہ ءِ گوما راجی وشیاں بہر کنگ راستیں سرکاری ھزمت اِنت، قیصر شیخ

فیصل آباد/چنیوٹ ۔ 15 اگست (اے پی پی): سرمایہ کاری بورڈ ءِ وفاقی وزیر قیصر شیخ ءَ گوشت کہ آجوئی ءِ مراگش ھما وھد ءَ راستی ءَ بامرد بیت وھدے کہ چاگرد ءِ ھر تبک ھاسیں رنگ ءَ مزدور ءُ کم آمدنی ءِ مردم آئی ءِ وشیاں ھوار بہ بنت۔ آئی ءَ گوشت کہ مھکمیں دفاع ءِ واستہ یک پائیداریں معاشی بنیات ءِ پجاری یک راجی ذمہ واری یے، وھدیکہ پاکستان ءَ را معاشی رد ءَ وت واجہ ءُ دیمروئی کنگ ءِ واستہ سرمایہ کاری، صنعتی چست ءُ ایر، روزگار ءُ راجی یکوئی ءَ را ھمک وھد ءَ دیم ءَ برگ لوٹ ایت۔ آجوئی ءِ روچ ءِ موہ ءَ میڈیا ءَ گوں تران کنان ءَ ہر سال ءِ وڑ ءَ اے سال ءَ ھم چنموی ءَ رکشہ ڈرائیور آنی نیام ءَ پنچ لیٹر مفت پٹرول ءِ بھر ءُ بانگ ءِ موہ ءَ وفاقی وزیر ءَ گوشت کہ آجوئی ءِ روچ ایوک ءَ راجی پرچم ءِ چست کنگ ءُ مراگش آنی برجم دارگ ءِ روچ نہ اِنت بلکیں اے مئے یک مزنیں وشی ءُ شاتی ءِ روچ اِنت۔ آئی ءَ گوشت کہ آجوئی ءِ برکت ءَ را لوٹ ایت کہ ما ملک ءَ را مھکمءُ وشھال جوڑ کنگ ءِ واستہ وتی زمہ واری آناں سرپد بہ بئیں ءُ راجی زندمان ءِ ھمک شوبگ ءِ گہتری ءِ واستہ وتی کرد ءَ پیلو بہ کن ایں ۔ قصر شیخ ءَ گوشت کہ گوستگیں بازیں سالاں چہ آجوئی ءِ روچ ءِ موہ ءَ رکشہ ڈرائیور ءُ مزدور تبک ءِ نیام ءَ مفت پٹرول بھر ءُ بانگ ءِ روایت ءَ برجم دارگ ءَ آں۔ اے گامگیج ءِ مول ءُ مراد ایوک ءَ مالی کمک ءِ دیگ نہ اِنت بلکیں ھما مردم کہ وتی ھاندان ءِ زند ءِ گوازینگ ءُ شہری زند ءِ چکر ءَ را دیم ءَ برگ ءِ ھاترا سک محنت کن اَنت آ راجی وشھالی ءِ بھر جوڑ کنگ اِنت۔ آئی ءَ گوشت کہ رکشہ کشاں ھوار مزدور تبک چاگرد ءِ معیشت ءِ تہ ءَ المی کرد ءِ پیلو کنت ءُ ایشانی جیڈھ آناں یلہ کنگ ءَ چہ دیمروئی ءِ تصور سرجم بوت نہ کنت۔ وفاقی وزیر ءَ گوشت کہ آجوئی ءِ روچ ءِ موہ ءَ پٹرول ءِ بھر ءُ بانگ یقینی رنگ ءَ علامتی گامگیج اِنت، البت ایشی ءِ وسیلگ ءَ مزدور الس ءِ گوما یکوئی ءُ آھانی ھزمت آنی شناخت ھم کنگ بوھگ ءَ اِنت کہ راجی میلہ ایوک ءَ مراعات یافتہ تبک ءَ گوں بندوک نہ اِنت، اے ریاست ءُ الس دوئیں آنی ذمہ واری اِنت۔ آئی ءَ گوشت کہ پاکستان ءِ دیم ءَ اوشتاتگیں اقتصادی چیلنج آں گوں گر ءُ چیل بوھگ ءِ واستہ مھکم ءُ مھکمیں معیشت المی اِنت، راجی ایمنی، السی وشھالی ءُ برجمیں دیمروئی اقتصادی برجائی ءَ گوں براہ راست سیادی دار اَنت۔ آئی ءَ گوشت کہ حکومت ملکی ءُ درملکی سرمایہ کاری ءِ تہ ءَ گیشی، صنعت آناں زندگ کنگ، کاروباری چست ءُ ایر آناں دیمروئی دیگ ءُ برآمدات ءِ تہ ءَ گیشی ءِ واستہ جتا جتائیں گامگیج کنگ ءَ انت۔ آئی ءَ گوشت کہ کجام ھم ملک ءِ معیشت ھما وھد ءَ مھکم بیت کہ آئی ءِ تہ ءَ سرمایہ کاری ءِ نوکیں دروازگ پچ بنت، صنعت وتی پیداواری گنجائش ءَ را گیش کن اَنت، دمگی پیداوار جھان ءِ مارکیٹ آنی تہ ءَ سر بنت ءُ ورنا آناں جوانیں روزگار ءِ موہ رس اَنت۔ آئی ءَ گوشت کہ پاکستان ءَ افرادی قوت ءِ کمی نہ انت، ورنا آناں مارکیٹ ءِ لوٹ آنی گوما ھمگرنچیں نوکیں وانگ ءُ زانگ، ٹیکنیکل ٹریننگ ءُ ہنر پجاری ءِ ضلورت انت تانکہ آ نا ایوک ءَ ملکی صنعت ءُ تجارت ءِ تہ ءَ وتی کرد ءَ پیلو بہ کن انت بلکینگ ءَ جھان ءِ تک ءَ پاکستان ءِ نمائندگی ءَ بہ کن انت۔ وفاقی وزیر ءَ گوشت کہ حکومت ءَ سرمایہ کار آنی واستہ کاروباری چاگرد ءَ را گہتر جوڑ کنگ ءُ سرمایہ کاری ءِ عمل ءَ را آسان جوڑ کنگ ءِ واستہ اصلاحات ءِ سر ءَ عمل کنگ بوتگ۔ ملکی معیشت بحالی ءِ واستہ ایوک ءَ حکومتی کوشست  سرجم نہ انت، بلکہ بزنس کلاس، صنعت کار، سوداگر، ورنا ءُ عام شہری ہم راجی دیمروئی ءِ عمل ءَ وتی بہر ءَ بہ کن انت۔ قیصر احمد شیخ  ءَ دفاع ءُ چاگرد ءِ نیام ءَ سیادی ءِ سر ءَ رژنائی ءِ شنگ کنگ ءَ گوشت کہ مھکمیں دفاع ءُ یک مھکمیں معیشت یکے دومی ءَ چہ جتا نہ انت۔ پاکستان ءِ سلاہ بندیں اُرداں ھمک گرانیں وھد ءَ ملک ءِ رکھینگ ءِ فرض پیلو کتگ ءُ وطن ءِ ایمنی ءِ واستہ بے دروریں قربانی داتگ۔ آئی ءَ گوشت کہ سرجمیں راج وتی بہادریں قوت آنی قربانی آنی ستا ءَ کنت، البت ملک ءِ دفاع ءَ را گیش مھکم کنگ ءِ واستہ اقتصادی بنیات آناں ھم مھکم کنگ المی اِنت۔ وھدے کہ ملک ءِ چاگرد مھکم بہ بیت، روزگار ءِ موہ گیش بہ بنت، صنعت سرگرم بہ بنت، برآمدات گیش بہ بنت ءُ راجی آمدنی گہتر بہ بیت گڈا ملک اندری ءُ درائیں چیلنج آنی گوما گیش جوانیں رنگ ءَ دیم پہ دیم بوت کنت۔ پمیشکا اقتصادی دیمروئی ءَ را یک جامعیں راجی ایمنی ءِ رھبند ءِ یک جتائیں بہرے لیکگ بہ بیت۔ وفاقی وزیر ءَ ورنا آناں ملک ءِ ارزشتی ایں سرڈگار لیکگ ءِ وھد ءَ گوشت کہ پاکستان ءِ آیوکیں دیمروئی گیش ءَ چہ گیش ورنا نسل ءِ ہنر ءُ ازم آنی سر ءَ بندوک انت۔ آئی ءَ ورنا آناں زور پر دات کہ آ وانگ ءُ زانگ ءِ ھمراھی ءَ ٹیکنیکل ءُ پیشہ وارانہ ہنر ءَ بہ زور اَنت، نوکیں ٹیکنالوجی ءَ چہ سیت چست بہ کن اَنت ءُ محنت ءُ ایمانداری وتی زندمان ءِ اصول جوڑ بہ کن اَنت۔ اگاں ورنا وتی تواناں جوانیں چست ءُ ایر، وانگ، ہنر، احساس ءُ کاروبار ءِ واستہ ندر بہ کن انت گڈا پاکستان ءِ دیمروئی ءِ رفتار ءَ را باز رند ءَ گیش کنگ بوت کنت۔ ملک ءِ دیمروئی ایوک ءَ حکومت یا یک ادارگ ءِ زمہ واری نہ انت بلکینگ ءَ ہر شہری ہمے عمل ءِ بہر انت۔ کسان، مزدور، استاد، ڈاکٹر، انجینئر، سوداگر، صنعت کار، سرکاری ملازم ءُ ورنا درست وتی جاہ ءَ پاکستان ءِ دیمروی ءِ تہا وتی کرد ءَ پیلو کنگ ءَ انت۔ آئی ءَ گوشت کہ مارا یک راجی ذمہ واری ءِ رنگ ءَ وتی زمہ واری پیلو کنگی اِنت ءُ کسانیں جوانیں کرد ھم اجتماعی رنگ ءَ ملک ءِ آیوکیں وھد ءِ سر ءَ مزنیں اثرے کت کنت۔ قصرہ احمد شخت ءَ گوشت کہ آجوئی ءِ روچ نہ ایوک ءَ مارا گوست ءِ قربانی آں چہ سبق دنت بلکینگ ءَ مارا آیوکیں وھد ءِ واستہ اجتماعی جزم ءِ موہ ھم دنت۔ ما بایدیں وعدہ بہ کنیں کہ ما قانون ءِ رھبند، ایمانداری، محنت، نظم ءُ ضبط ءُ راجی یکوئی ءَ وتی اجتماعی زند ءِ بہرے جوڑ بہ کنیں۔ آئی ءَ گوشت کہ اختلاف ءِ باوجود چاگرد ءَ برداشت، وت مہ وتی شرپ ءُ شرپ ءِ روایت ءَ را مھکم کنگ ءُ راجی نپ ءَ را اولی جاہ ءَ ایر کنگ وھد ءِ ھاسیں لوٹ انت۔