اسلام آباد ۔ 10 ستمبر (اے پی پی) پبلک اکاﺅنٹس کمیٹی ءِ جھلی کمیٹ ءِ دیون سیکرٹری پاور ڈویژن ءِ ساڑی نہ بوھگ ءِ سبب ءَ مھتل کنگ بوت۔ پنچ شمبے ءِ روچ ءَ دیوان کمیٹٰ ءِ کنوینر راجہ ریاض احمد ءِ سروکی ءَ پارلیمنٹ گس ءَ برجم دارگ بوت ایشی ءِ تہ ءَ کمیٹی ءِ باسک سیمی ایزدی ءُ حنا ربانی کھرر ءَ وڈیو لنک ءِ وسیلگ ءَ بھر زوری کت۔ دیوان ءَ پاور ڈویژن ءِ 2018-19 آڈٹ بُکگ آنی چار ءُ تپاسی گرگی ات پدا ھم بندات ءَ کمیٹٰ ءِ کنوینر راجہ ریاض احمد ءَ سیکرٹری پاور ڈیژن ءِ انوگ ءَ چہ کمو پیسر 10 بچ ءَ کلوہ رستگ کہ آ دیوان ءَ بھر زرت نہ کنت ۔ آئی ءَ گوشت کہ کار رپک شر نہ انت۔ آئی ءَ گوشت کہ من فیصل آباد ءَ چہ سفر کنان ءَ اتکگ آں۔ ھمے رنگ ءَ ایندگر باسک ھم دور ءُ گستا سفر کنان ءَ اتکگ انت۔ پاور ڈیژن ءِ نیمگ ءَ گوشگ بوتگ کہ سیکرٹری ڈویژن ءَ را دگہ جاھ روگ کپگ ءَ انت ھمے ھاترا اتک نہ کنت۔ سپیشل سیکرٹری ھم اکنامک کوآرڈینیشن ءِ دیوان ءَ انت۔ کمیٹٰ ءِ باسک سیمیایزدی ءُ حنا ربانی کھر ءَ اے جیڈھ ءِ سر ءَ نہ وشی ءِ درشان کت ءُ شور ءُ سلاھ دات کہ دیوان جاک ءُ کوکار ءَ گوں رد کنگ نہ بیت۔ کمیٹی ءِ کنوینر راجہ ریاض احمد ءَ پی اے سی سیکرٹریٹ ءَ را پنت ءُ شون کت کہ سیکرٹری پاور ڈویژن ءِ اے رنگ ءَ کار کنگ ءِ ھلاپ ءَ مزن وزیر ءِ سیکرٹری، سیکرٹری اسٹیبلشمنٹ ءُ پاور ڈویژن ءِ وزیر ءَ را نمدی نبشتہ کنگ بہ بیت۔
