مزن وزیر عمران خان ءِ داتگیں پنت ءُ شون ءِ رد ءَ اھوالکار آنی جیڈھ آنی گیواری ءِ واستہ توامیں آسراتی آناں کارمرد کنگ ءَ آں،
اسلام آباد ۔ 9 ستمبر (اے پی پی) بنجاھی وزیر اھوالکاری ءُ شنگ کاری سینیٹر شبلی فراز ءَ گوشت کہ مزن وزیر عمران خان ءِ داتگیں پنت ءُ شونگ ءِ پد ءَ اھوالکاری آنی جیڈھ آناں گیواری ءِ واستہ توامیں آسراتی آناں کارمرد کنگ ءَ آں، استیں حکومت آزاتی ءَ گوں وتی لیکہ آنی درشان ءِ سر ءَ یکیم دار ایت، پاکستان ءِ 22 کروڑ الس بزگ ءُ کودکیں کشمیری آنی گوما ھمکوپگ اوشتاتگ، میاں اوستمانی برات آنی ھاموشی مارا سر سوج کنت کہ کشمیر آنی واستہ ھرچی کہ کنگی انت آ مارا کنگی انت، مزن وزیر عمران کان ءَ کشمی ءِ وکیل ءِ بستار ءَ ءُ سفیر جوڑ بوھان ءَ میاں اوستمانی تک ءَ کشمیر ءِ جیڈھ ءَ جوانیں رنگ ءَ سہرا کتگ۔ آ چار شمبے ءِ روچ ءَ نیشنل پریس کلب ءَ نوک گچین بوتگیں باسک آنی سوگندی مراگش ءَ گوں گشتانک دیان ءَ کت۔ بنجاھی وزیر سینیٹر شبلی فراز ءَ گوشت کہ یک سالے ءَ چہ گیش گوستگ کہ بھارت ءَ اے کودک ءُ بزگیں کشمیری آناں کیز ءُ بندی جاھ ءَ آوار جتگ۔ آئی ءَ گوشت کہ بھارت ءِ زوراکی ءَ چہ میاں اوستمانی دگنیا ھاموش انت، ھرچی کنگی انت مارا کنگی انت۔ آئی ءَ گوشت کہ پاکستانی الس اچ ساھت ءَ کشمیری برات آناں اے سما کنگ نئیل ایت کہ آ مشکلیں ءُ گرانییں ساھت ءَ ایوک انت۔ ما آوانی گوما ھمکوپگ اوشتاتگ آں۔ آئی ءَ گوشت کہ اھوالکاراں منی پت ءُ منارا باز واھگ ءُ دوستی داتگ ھمے ھاترا میڈیا منی دل ءِ نزیک ءَ انت، توامیں آسراتی اھوالکاراں دیگ بنت۔ آئی ءَ گوشت کہ نیشنل پریس کلب ءِ نوک گچین بوتگیں باسک آناں مبارک بات پیش کنان ءَ امیت سہرا کت کہ نوکیں گچین بوتگیں باسک نوکیں اھوالکار آنی جیڈھ آنی گیواری ءِ واستہ یک پُلے ءِ بستار ءَ کرد پیلو کن انت۔
