پاکستان نا یکتا غادنگ و سیم درملکی زرکار آتیکن دادے گچین وارخواہی والا ملک اس جوڑ کیک، ڈاکٹر عبدالحفیظ شیخ

اسلام آباد۔ 08 ستمبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ پاکستان نا یکتا غادنگ و سیم درملکی زرکار آتیکن دادے گچین وارخواہی والا ملک اس جوڑ کیک۔ داہیت ءِ او آسٹریلیا نا فور ٹسکیومیٹل پڑک لمیٹڈ نا چیئرمین اینڈریوفارسٹ نا کماشی ٹی پڑک نا ڈل اتون اوڑدہی ٹی گپ وتران کرسا پارے۔ اینڈریوفارسٹ پاکستان و آسٹریلین کمپنی نا نیام اٹ واپاری گمان آتا جاچ ءِ ہلنگ کن اوڑدہی آ وزیراعظم نا سلاہکار نا منت واری ءِ ہرفے۔ اوپارے کہ کمپنی ءِ 2003ء ٹی جوڑ کننگا۔ کمپنی آئرن و کانڑکنی نا بشخ اٹ نمان کاریم کرینے۔ کمپنی نا شمار فولاد تیار کروک آ دنیا نا بھلا کمپنی تیٹی مریک ہرانا پیدواری خڑچ آک ہم کم ءُ و پیداوار نا عمل ءِ رکھوک وڑاٹ انجام تننگک ۔ اوپارے کہ کمپنی داوخت آ چین، جاپان، سویلی کوریا، بھارت، ایکواڈور، کولمبیا، چلی، پیرو، پرتگال و قزاخستان اٹ کاریم کننگ ءِ۔ داوخت آ کمپنی سالانہ 170 ملین ٹن آئرن و کی شپنگ کننگ ءِ۔ وزیراعظم نا سلاہکار کمپنی نا ڈل انا ستاءِ کرے۔ اوپارے کہ پاکستان گچین دنگ و سیم تا حامل ملک اسے و دانا یکتا دنگ و سیم درملکی زرکارآتیکن دادے گچین وارخواہی والا ملک اس جوڑ کیک۔ اوپارے کہ پاکستان اٹی کولانا بھلو کوڑی اس ارے۔ داکان بیدس ملک اٹی جست و خیسن نا کوڑی ہم ارے۔ پاکستان شمسی پیداوار نا بابت ہم گچین ءُ ہند اس تخک۔ داکان بیدس دِیر آن 80 ہزار میگاواٹ بجلی نا کچ ساڑی ءِ۔ اوپارے کہ پاکستان کاروبار اٹی آسانی تا بابت جہانی بینک انا رینکنگ اٹ پیش رفت کرینے۔ خصوصی اقتصادی زون تا جوڑ کننگ نا کانود آن پاکستان اٹ توانائی، بنداوی پنجر، انفارمیشن و کمیونیکیشن ٹیکنالوجی، ٹیکسٹائل، ایپرل، سرجیکل ازباب، سِل و فٹ ویئر تون اوار کیہی بشخ آتیٹی زرکاری نا کچ ساڑی ءِ۔ اوپارے کہ دا غٹ بشخ آک واپار و زرکاری کن دننیا ءِ گچین وارخواہی فراوان کننگ ءُ۔ وزیراعظم نا سلاہکار کمپنی ءِ بنجائی، صوبائی و ہندی حکومت آتا کنڈآن پاکستان اٹ کاروبار ءِ مون آدننگ کن ہروڑنا کمکاری نا باوری کرفے۔ اوپارے کہ کمپنی نا کنڈآن پاکستان اٹ واپاری و کاروباری سرجزآتا بناءِ کننگ آن ملک اٹ شونداری وشونہالی ٹی کمک رسینگک۔