پاک بحریہ نا جہاز آک ہندوستانی بندرگاہ دوارکا آ جلہو کرسا ہندوستانی ریڈاراسٹیشن ءِ بھس کننگ تون اوار اوار دشمن نا غرور ءِ ہم مش تا کریر، یوم بحریہ 2020ء نا وخت آ پاک بحریہ نا سروک ایڈمرل ظفرمحمود عباسی نا کلہو

اسلام آباد۔ 08 ستمبر (اے پی پی) امیر البحر ایڈمرل ظفرمحمود عباسی پارینے کہ پاک بحریہ نا جہاز آک ہندوستانی بندرگاہ دُوارکا آ جلہو کرسا ہندوستانی ریڈاراسٹیشن ءِ بھس کننگ تون اوار اوار دشمن نا غرور ءِ ہم مش تا کریر، پاک بحریہ نا اسٹ انگا آبدوز غازی جنگ اٹی مچ آ بھارتی نیوی ءِ بھارتی بندرگاہ تیٹی بندی تخا۔ یوم بحریہ 2020ء نا وخت آ پاک بحریہ نا سروک ایڈمرل ظفرمحمود عباسی تینا کلہو اٹی پارے کہ 8 ستمبر نا دے پاک بحریہ نا شہید و غازی تا قربانی و جوزہ نا ستاءِ کننگ نا دے ءِ۔ دادے ننے تینا اسلاف نا کارنامہ و سرسہبی تا یات ترفک۔ اوپارے کہ آپریشن دوارکا ننا قومی تاریخ نا عظیم ءُ فتح سے۔ ایڈمرل ظفرمحمود عباسی پارے کہ اینو پاکستان نیوی ڈیہہ ٹی اسہ سوگو ءُ بحری واک اسے نا وڑاٹ چاہنگک۔ پاک بحریہ جہانی بحری فوج اتون اواری اٹ و ریجنل میری ٹائم سیکورٹی پٹرول نا کمک اٹ جہانی دِیر تیٹی امن و سوگوی ءِ پک کننگ ءِ۔ اوپارے کہ پاک چین اقتصادی راہداری ڈٹ انا رداٹ پاکستان نیوی تینا ودوک آ زمورای تیٹی اہم کڑد ءِ پورو کننگ کن تیار ءِ۔ اوپارے کہ سمندری سیم تا دفاع تون اوار اوار پاکستان نیوی میری ٹائم سیکٹر و بلیو اکانومی نا فائدہ غاتے ملک و قوم اسکان سرکننگ کن ہم سنبرینگوک ءِ۔ پاکستان نیوی سمندری پٹ وپول اٹ کمکاری آن بیدس سمندر اٹ ہائیڈرو کاربن وسیلہ غاتا پٹنگ کن کمک فراوان کننگ ءِ۔ اوپارے کہ اینو نادے پاک بحریہ نا آفیسر و ورناک تینا کشمیری ایلم تتون پورو یکجہتی نا درشانی ءِ کیرہ۔ پاک بحریہ نا غٹ آفیسرو ورناک دا عزم انا درشانی ءِ کیرہ کہ دترنا آخیریکو پُڑی اسکان تینا لمہ وطن نا دفاع ءِ کیرہ۔