تعلیمی سال 2020-21ء کن احساس انڈرگریجویٹ اسکالر شپ آن لائن پورٹل پوسکن آ درخواست آتا ہلنگ کن دُوارہ ملنگ انگا

119 یونیورسٹی تیٹی چار آن پنچ سال انا انڈرگریجویٹ ڈگری پروگرام تیٹی تعلیم حاصل کروک آ غٹ طالب علم آک آن لائن پورٹلhttps://ehsaas.hec.gov.pkنا کمک اٹ درخواست تننگ کیرہ، احساس اسکالرشپ پورٹل 30 اکتوبر 2020 اسکان ملوک مریک
اسلام آباد۔ 08 ستمبر (اے پی پی) تعلیمی سال 2020-21 ء کن احساس انڈرگریجویٹ اسکالر شپ آن لائن پورٹل پوسکن آ درخواست آتا ہلنگ کن دُوارہ ملنگ انگانے۔ملک انا 119 یونیورسٹی تیٹی چار آن پنچ سال انا انڈرگریجویٹ ڈگری پروگرام تیٹی تعلیم حاصل کروک آ غٹ طالب علم آک آن لائن پورٹلhttps://ehsaas.hec.gov.pkنا کمک اٹ درخواست تننگ کیرہ، احساس اسکالرشپ پورٹل 30 اکتوبر 2020 اسکان ملوک مریک۔ اسکالر شپ درخواست اٹی تعلقدار یونیورسٹی تا پن ءِ درج کننگ المی ءِ ہراڑے داخلہ درکار ءِ۔ تعلیمی سال 2019-20ء ٹی جم وڑاٹ 4.827 ارب روپئی نا احساس انڈرگریجویٹ اسکالر شپس 50،762 طالب علم آتے تننگا۔ وزیراعظم عمران خان 4 نومبر 2019ء آ احساس اسکالر شپ پروگرام نا باضابطہ بناءِ کریسس۔ دا پروگرام نا رداٹ ہر سال کم کٹیا کروک اُراتیان تعلق تخوک آ 50،000انڈرگریجویٹ طالب علم آتے وظیفہ تننگک۔ دا چارسال انا پروگرام آن 200،000 طالب علم فائدہ ہرفرہ۔ دا اسکالر شپ اٹ 100 درسد ٹیوشن فیس و 4،000 روپئی ماہانہ گزر بسر نا وظیفہ ہم اوار ءِ۔ ہمو غٹ طالب علم آک ہرافتا خاہوتی انکم 45،000 روپئی آن کم ءِ احساس اسکالر شپ اکن درخواست تننگ کیرہ۔ 24 ارب روپئی خڑچ انا احساس اسکالر شپ پروگرام نا دنگ اٹ غٹ ملک یعنی ہر چارآ صوبہ، آزاد کشمیر و گلگت بلتستان نا پبلک سیکٹر یونیورسٹیک اوار ءُ۔ 50 درسد اسکالر شپ مسن تیکن و 2 درسد معذور طالب علم آتیکن جتا ءِ۔ اسکالر شپ دوئی کروک آ طالب علم آتا تعلیمی کارکڑد نا پدریسہ جاچ ءِ ہلنگک و است جم کارکڑد نشان تروک آ طالب علم آتے وظیفہ نا زرتس پورو ڈگری پروگرام نا پوروی اسکان برجاسلک۔ حکومت نا اسکالر شپ پالیسی ٹی دا پوسکن آ جہت آ گپ وتران کرسا خصوصی کمکار راجی رکھ و تخفیف نیزگاری ڈاکٹر ثانیہ نشتر پارے کہ دا پروگرام مسہ پوسکن آ پالیسی شفٹ آتا ڈیک ءِ، اولیکو داکہ گرج آ مبنی ملک انا دا غٹ آن بھلا اسکالر شپ پروگرام ءِ ہراکہ کم کٹیا کروک اُراتا چناتے بڑزکو تعلیم دوئی کننگ کن وارخواہی فراوان کیک۔ ارٹ میکو، داغٹ آن بھلا قومی اسکالرشپ پروگرام ءِ۔ مسٹ میکو دا اسکالر شپ کم کٹیا کروک خاہوت آتیکن ذرائع معاش ودی کیک۔ ہائر ایجوکیشن کمیشن دا پروگرام نا عملدرآمدی ادارہ ءِ۔ سال 2019-20ء کن جم وڑاٹ 132،192 درخواست ہائر ایجوکیشن کمیشن نا آن لائن پورٹل آ ملاسس۔ پک کروک ضابطہ غاتارداٹ جانچ پڑتال آن پد 50،762 طالب علم آتے اسکالر شپ جاری کننگا۔ دا پروگرام نا چاروکی ءِ احساس اسکالر شپ اسٹیئرنگ کمیٹی کننگ ءِ، ہرانا کماشی ءِ خصوصی کمکار راجی رکھ و تخفیف نیزگاری ڈاکٹر ثانیہ نشتر و چیئرمین ہائر ایجوکیشن کمیشن طارق بنوری کننگ ءُ۔ پروگرام اٹ شفافیت، میرٹ و احتساب نا عمل ءِ پک کننگ کن چاروکی و جانچ پڑتال نااسہ اسیجائی فریم ورک اس ٹہیفنگانے۔